ৰাষ্ট্ৰীয় নাগৰিকপঞ্জীৰ চূড়ান্ত খচৰা প্ৰকাশৰ প্ৰাকক্ষণত ওদালগুৰি জিলা প্ৰশাসনে জিলাখনত সজাগতা অভিযান কাৰ্যসূচী ৰূপায়ণ কৰিছে।
এই উদ্দেশ্যে যোৱা কিছু দিন ধৰি জিলাখনৰ বিভিন্ন স্থানত এলানী সজাগতা সভা অনুষ্ঠিত কৰা হৈছে। ইয়াৰ অংশ হিচাপে দেওবাৰে আবেলি ওদালগুৰিৰ ওৰাঙৰ অন্তৰ্গত জংগল ব্লক প্ৰাৰ্থমিক বিদ্যালয়ত এখন সজাগতা সভা অনুষ্ঠিত হয়।
উক্ত সভাত জিলা প্ৰশাসনৰ বিষয়ববীয়া সকলে কোচ-ৰাজবংশী, হাজং আৰু ধৰ্মীয় সংখ্যালঘু প্ৰধান অঞ্চলটোৰ লোকসকলক এন আৰ চিৰ খচৰা প্ৰকাশৰ পিছত শান্তিৰ বাতাবৰন বৰ্তাই ৰাখিবলৈ আহ্বান জনায়।
মাজবাতৰ ৰাজহ চক্ৰ বিষয়া ধ্ৰিতিমান দাসে চূড়ান্ত খচৰাত কেনেবাকৈ নাম নহা ব্যক্তিসকলক আতংকিত নহ’বলৈ আহ্বান জনাই কয় যে তেওঁলোকক নিজৰ দাবী আৰু অভিযোগ পঞ্জীয়ন কৰিবলৈ পৰ্যাপ্ত সুযোগ দিয়া হ’ব বুলি জানিবলৈ দিয়ে।
আজিৰ এই সজাগতা সভাত বহু সংখ্যক স্থানীয় লোকে অংশ গ্ৰহণ কৰে।
