এক ভয়াৱহ বিস্ফোৰণে হত্যালীলা চলালে পাকিস্তানত। সোমবাৰে পাকিস্তানৰ স্বাত জিলাত থকা সন্ত্ৰাসবাদ বিৰোধী বিভাগৰ থানাত সংঘটিত হয় এই বিস্ফোৰণ। ভয়াৱহ বিস্ফোৰণৰ ফলত ১২ গৰাকী আৰক্ষী কৰ্মচাৰী নিহত হোৱাৰ লগতে ৪০ গৰাকীতকৈ অধিক লোক আহত হয়।
স্বাত জিলা আৰক্ষীয়ে সদৰী কৰা মতে, থানাখনৰ ভিতৰত দুটাকৈ বিস্ফোৰণে ধ্বংসলীলা চলায়। খাইবাৰ পাখতুনখোৱাৰ আৰক্ষী মহাপৰিদৰ্শক আখতাৰ হায়াত খানে ঘটনা সন্দৰ্ভত সংবাদ মাধ্যমৰ আগত উল্লেখ কৰা মতে, বিস্ফোৰণৰ কাৰণ এইপৰ্যন্ত জানিব পৰা হোৱা নাই।
তেওঁ লগতে কয় যে, থানাখনত এটা পুৰণি গোলাবাৰুদৰ ভাণ্ডাৰ আছিল। এই ভাণ্ডাৰত মজুত থকা বিস্ফোৰকৰ ফলতে বিস্ফোৰণৰ সন্দেহ প্ৰকাশ কৰি তেওঁ আৰক্ষীয়ে এই সন্দৰ্ভত তদন্ত চলোৱা বুলি সদৰী কৰিছে। এইপৰ্যন্ত কোনো সংগঠন তথা ব্যক্তিয়ে বিস্ফোৰণৰ দায়িত্ব স্বীকাৰ কৰা নাই বুলিও তেওঁ লগতে কয়।
ইফালে সন্ত্ৰাসবাদ বিৰোধী বিভাগৰ আৰক্ষী প্ৰধান খালিদ সোহাইলেও থানাত কোনো আক্ৰমণৰ ধাৰণা খাৰিজ কৰে। বিস্ফোৰণটো গোলাবাৰুদ আৰু মৰ্টাৰ শ্বেল মজুত থকা ঠাইত সংঘটিত হৈছে বুলি উল্লেখ কৰি তেওঁ থানাত কোনো ধৰণৰ আত্মঘাতী আক্ৰমণ বা গুলীচালনা হোৱা নাই বুলি মন্তব্য কৰে।
তেওঁ লগতে কয় যে বিস্ফোৰণৰ কাৰণ উদ্ঘাটনৰ বাবে তদন্ত চলি আছে আৰু গোচৰৰ তদন্তৰ বাবে বিস্ফোৰণৰ স্থানত বোমা নিষ্কাশন দল উপস্থিত হয়। সোহাইলে সদৰী কৰা মতে, ধ্বংস হোৱা অট্টালিকাটো পুৰণি আৰু বেছিভাগ কাৰ্যালয় আৰু কৰ্মী নতুন অট্টালিকাতহে থাকে।
এই ঘটনাৰ পৰিপ্ৰেক্ষিতত প্ৰাদেশিক স্বাস্থ্য বিভাগে স্বাতৰ চিকিৎসালয়সমূহত জৰুৰীকালীন অৱস্থা জাৰি কৰে। ঘটনা সন্দৰ্ভত প্ৰতিক্ৰিয়া প্ৰকাশ কৰি পাকিস্তানৰ প্ৰধানমন্ত্ৰী শ্বেহবাজ শ্বৰীফে প্ৰাণ হেৰুওৱা সকলৰ প্ৰতি শোক প্ৰকাশ কৰে।
