বলিউদ শিল্পী লাকী আলীৰ অনুষ্ঠানেৰে সামৰণি পৰিল দৈজিং মহোৎসৱ
১২ দিনীয়া বৰ্ণাঢ্য কাৰ্যসূচীৰে চিৰাং জিলাৰ আই নদীৰ পাৰত অনুষ্ঠিত তৃতীয় দৈজিং মহোৎসৱৰ সফল সামৰণি পৰে। বিগত ২৭ ডিচেম্বৰৰ পৰা চলা এই মহোৎসৱৰ অন্তিমটো দিনত মহোৎসৱ বাকৰিত উপস্থিত থাকে বহু শিল্পী, ৰাজ্যৰ শীৰ্ষ আমোলা, তাৰকা, ৰাজনীতিবিদকে ধৰি ভালেমান লোক।
বাৰ দিনীয়া মহোৎসৱৰ গোটেইকেইটা দিনতেই দেশী বিদেশী শিল্পীয়ে গিজগিজাই থকা আই নদীৰ পাৰত মুখ্য মন্ত্ৰী সৰ্বানন্দ সোণোৱালৰ লগতে বিত্ত মন্ত্ৰী ড০ হিমন্ত বিশ্ব শৰ্মা, খাদ্য আৰু অসামৰিক যোগান মন্ত্ৰী ফণীভূষণ চৌধুৰী, জনস্বাস্থ্য কাৰিকৰী মন্ত্ৰী ৰিহণ দৈমাৰী, বি টি চি প্ৰধান হাগ্ৰামা মহিলাৰী, বি টি চিৰ ডেপুটি চীফ খাম্পা বৰগয়াৰী, পৰ্যটন মন্ত্ৰী চন্দন ব্ৰহ্ম আদিও উপস্থিত থাকে।
বাংলাদেশ, ইণ্ডোনেছিয়া, থাইলেণ্ড, ইটালী, নেপাল আদিৰ পৰা অহা ভালেসংখ্যক শিল্পীয়ে অনুষ্ঠান পৰিৱেশন কৰাৰ লগতে কেউটা দিনতেই স্থানীয় শিল্পীসকলে পৰিৱেশন কৰে ভালেমান মনোমোহা অনুষ্ঠান।
বিভিন্ন দিনত উপস্থিত থাকে বলিউদৰ জনপ্ৰিয় শিল্পী মালাইকা আৰোৰা, দ্য গ্ৰেট খালী, কণ্ঠশিল্পী অমিত ত্ৰিবেদী, ভূমি ত্ৰিবেদি, হিমশ ৰেশমিয়া, লাকী আলী, কৈলাশ খেৰৰ দৰে আন্তঃৰাষ্ট্ৰীয় খ্যাতিসম্পন্ন শিল্পী। অন্তিমটো দিনত সুদূৰ নিউজিলেণ্ডৰ পৰা কেৱল দৈজিং মহোৎসৱত অংশগ্ৰহণৰ বাবে আহে জনপ্ৰিয় কণ্ঠশিল্পী লাকী আলী।
অনুষ্ঠানত ভালেমান বড়ো পৰম্পৰাগত শিল্প, খাদ্য, সংস্কৃতিৰ উপৰি প্ৰদৰ্শিত হয় ৰোমাঞ্চকৰ ক্ৰীড়া, ৰাইফল শ্বুটিং, জীপ ছাফাৰী, আতচবাজী প্ৰদৰ্শনী আদি। অনুষ্ঠানৰ সফল সামৰণিৰ পিছত এই দৈজিং মহোৎসৱ সন্দৰ্ভত মন্তব্য কৰি ৰাজ্যৰ পৰ্যটন মন্ত্ৰী চন্দন ব্ৰহ্মই কয়, ‘ৰাজ্যৰ কেলেণ্ডাৰ ইভেণ্চ হিচাপে দৈজিং ফেষ্টভেলে স্থান পালে, আটাইকেইটা দিনতেই অনবদ্য সহাৰিৰে ৰাজ্যৰ ভিতৰতে অন্যতম সফল অনুষ্ঠান হিচাপে অভিহিত হৈছে এই দৈজিং ফেষ্টিভেল’।