সেনা বিষয়াক নিৰ্মমভাবে প্ৰহাৰ কৰাৰ অপৰাধত পঞ্জাৱত নিলম্বন ১২জন আৰক্ষীক
গাড়ী পাৰ্কিংক লৈ হোৱা বিবাদত পঞ্জাৱ আৰক্ষীয়ে এজন সেনা বিষয়া আৰু তেওঁৰ পুত্ৰক গুৰুতৰভাৱে প্ৰহাৰ কৰাৰ অভিযোগ উত্থাপন হৈছে।
অভিযোগ অনুসৰি, কেইবাজনো আৰক্ষীয়ে বেছবলৰ বেটেৰে প্ৰায় ৪৫ মিনিট ধৰি প্ৰহাৰ কৰে পুত্ৰসহ সেনা বিষয়াগৰাকীক।
এই ঘটনা পোহৰলৈ অহাৰ লগে লগে তীব্ৰ বিতৰ্কৰ সৃষ্টি হয়। ১২ জন অভিযুক্ত আৰক্ষীক নিলম্বন কৰাৰ উপৰিও এই ঘটনাৰ তদন্তৰ বাবে এখন তদন্ত সমিতি গঠন কৰা হৈছে। ৪৫ দিনৰ ভিতৰত তদন্তৰ প্ৰতিবেদন দাখিল কৰাৰ নিৰ্দেশ দিছে ভগৱন্ত মান চৰকাৰে।
এই ঘটনা সংঘৰটিত হৈছিল যোৱা ১৩ মাৰ্চত। দিল্লী সেনাৰ মুখ্য কাৰ্যালয়ত কৰ্মৰত বিষয়া কৰ্ণেল পুছপিন্দৰ বাথ আৰু তেওঁৰ পুত্ৰই পাটিয়ালাৰ এখন চিকিৎসালয়ৰ কাষত নিজৰ গাড়ীখন পাৰ্ক কৰে। সেই সময়ত তিনিজন সাধাৰণ কাপোৰ পিন্ধা আৰক্ষী বিষয়াই তেওঁলোকক গাড়ীখন স্থানান্তৰ কৰিবলৈ নিৰ্দেশ দিয়ে। সেই কথাত তেওঁলোকে আপত্তি কৰে আৰু তৰ্ক-বিতৰ্কৰ আৰম্ভ হয়।
অভিযোগ অনুসৰি, সেই সময়ত এজন আৰক্ষী বিষয়াই নিৰ্বিচাৰে সেনা বিষয়াজনক প্ৰহাৰ কৰে। বাধা দিবলৈ চেষ্টা কৰোঁতে বিষয়াগৰাকীৰ পুত্ৰকো প্ৰহাৰ কৰে আাৰক্ষীয়ে। মাৰপিটৰ ফলত সেনা বিষয়াজনৰ হাত ভাঙি যায়। পুত্ৰয়ো মূৰত গুৰুতৰভাৱে আঘাতপ্ৰাপ্ত হয়।
কেৱল সেয়াই নহয়, এই ঘটনাৰ পিছত তেওঁলোকে থানাত এজাহাৰ দাখিল যোৱাৰ সময়ত আৰক্ষীয়ে তেওঁলোকক ভাবুকি দিয়ে।
শেহতীয়াকৈ এই আক্ৰমণৰ চিচিটিভি ফুটেজ প্ৰকাশ পাইছে। ৰাইযৰ হেঁচাত পটিয়ালা আৰক্ষীয়ে এই ঘটনাৰ অভিযুক্ত ১২ জন আৰক্ষীক নিলম্বন কৰে। আৰক্ষী বিষয়া ডা. নানক সিঙে কয় যে এই ঘটনাত ইতিমধ্যে ১২ জন আৰক্ষী জোৱানক নিলম্বিত কৰা হৈছে। বিভাগীয় তদন্তৰো নিৰ্দেশ দিয়া হৈছে। তদন্ত সম্পূর্ণ কৰি অহা ৪৫ দিনৰ ভিতৰত প্রতিবেদন দাখিল কৰা হ’ব বুলি জানিবলৈ দিয়ে আৰক্ষী বিষয়াগৰাকীয়ে৷