সংসদৰ শীতকালীন অধিৱেশনৰ সময়তে উচ্ছৃংখল আচৰণৰ বাবে ১২ জন বিৰোধী সাংসদক ৰাজ্যসভাৰ পৰা নিলম্বিত কৰা হৈছে।
নিলম্বিত সাংসদসকলৰ ভিতৰত আছে কংগ্ৰেছৰ ছয়জন, তৃণমূল কংগ্ৰেছ আৰু শিৱসেনাৰ দুজনকৈ, আৰু চিপিআই আৰু চিপিএমৰ এজনকৈ সাংসদ।
নিলম্বিত সাংসদ সকল হৈছে কংগ্ৰেছৰ ফুলো দেৱী নেতাম, ছায়া বাৰ্মা, ৰিপুন বৰা, ৰাজমণি পেটেল, চৈয়দ নাছিৰ হুছেইন আৰু অখিলেশ প্ৰসাদ সিং; তৃণমূল কংগ্ৰেছৰ দোলা সেন, শান্তা ছেত্ৰী; শিৱসেনাৰ প্ৰিয়ংকা চতুৰ্বেদী, অনিল দেশাই; চিপিএমৰ এলামাৰাম কৰিম; আৰু চিপিআইৰ বিনয় ভিস্বম।
চৰকাৰী জাননীখনত কোৱা হৈছে, “এই সদনে অধ্যক্ষৰ কৰ্তৃত্বৰ প্ৰতি সম্পূৰ্ণ অৱজ্ঞা, সদনৰ নিয়মৰ সম্পূৰ্ণ অপব্যৱহাৰক তীব্ৰ গৰিহণা দিয়ে। ৰাজ্যসভাৰ ২৫৪ তম অধিৱেশনৰ শেষ দিনটোত অৰ্থাৎ ১১ আগষ্টত নিৰাপত্তাকৰ্মীসকলৰ ওপৰত তেওঁলোকৰ অসদাচৰণ, ঘৃণামূলক, উচ্ছৃংখল আৰু হিংসাত্মক আচৰণ আৰু ইচ্ছাকৃত আক্ৰমণৰ জৰিয়তে ইচ্ছাকৃতভাৱে সদনৰ কাৰ্যকলাপত বাধা প্ৰদান কৰে।”
পেগাচাছ স্নুপিং আৰু তিনিখন কৃষি আইনক লৈ বিৰোধীয়ে প্ৰতিবাদ কৰাৰ বাবে নিৰন্তৰ ব্যাঘাত আৰু স্থগিতৰ বাবে সংসদৰ বৰ্ষাকালীন অধিৱেশন আগষ্টত নিৰ্ধাৰিত সময়তকৈ দুদিন আগতে সমাপ্ত হৈছিল।
বৰ্ষাকালীন অধিৱেশনৰ অন্তিম দিনটোত বিৰোধী সাংসদসকলে সংসদৰ মেজত উঠি ক’লা কাপোৰ প্ৰদৰ্শন কৰিছিল আৰু নতুন কৃষি সংস্কাৰ আইনৰ বিৰুদ্ধে কৃষকসকলৰ প্ৰতিবাদৰ ওপৰত আলোচনা আৰম্ভ কৰাৰ সময়ত টেবুলৰ ফাইলসমূহ দলিয়াইছিল। তেওঁলোকে নিৰাপত্তাকৰ্মীসকলকো আক্ৰমণ কৰাৰ অভিযোগ উঠিছিল।
আনহাতে বিৰোধীয়ে অভিযোগ কৰিছিল যে সাংসদসকলক নিৰাপত্তাকৰ্মীয়ে দুৰ্ব্যৱহাৰ কৰিছিল।
ইয়াৰ পিছতে ৰাজ্যসভাৰ অধ্যক্ষ ভেংকায়া নাইডু আৰু লোকসভাৰ অধ্যক্ষ ওম বিৰলাই এনে উচ্ছৃংখল দৃশ্য আৰু এনে ক্ষেত্ৰত ভৱিষ্যতৰ কাৰ্যপন্থাৰ বিতং পৰীক্ষা কৰাৰ সিদ্ধান্ত লৈছিল।
