নগাঁও জিলাৰ শালনা আঞ্চলিক বন বিষয়াৰ কাৰ্যালয়ৰ অধীনৰ বৃহত্তৰ অঞ্চলত পূৰ্বে কেতিয়াও উদ্ধাৰ নোহোৱা এডাল বৃহৎ আকাৰৰ অজগৰ উদ্ধাৰ হয়।
উদ্ধাৰ হোৱা অজগৰটোৰ দৈৰ্ঘ্য প্ৰায় ১৪.৪ ফুট আৰু ওজন প্ৰায় ৩০ কিলোগ্ৰামতকৈও অধিক হ’ব বুলি বন বিভাগে জনায়।
অজগৰডাল ডাঙিবলৈ প্ৰয়োজন হৈছিল প্ৰায় সাত জনকৈ লোকৰ। এনেধৰণৰ বৃহৎকায় অজগৰ উক্ত অঞ্চলত কেতিয়াও উদ্ধাৰ হোৱা নাই বুলি জনায় বন বিভাগৰ লোকে।
উল্লেখ্য যে, মুখ্য মন্ত্ৰী সোনোৱালে যোৱা ৭৩ সংখ্যক স্বাধীনতা দিৱসৰ দিনা গুৱাহাটীৰ খানাপাৰাত ৰাজহুৱাভাবে “মুখ্য মন্ত্ৰীৰ শ্ৰেষ্ঠ সামূহিক কৰ্ম বঁটা-২০১৯” প্ৰদান কৰা নগাঁও জিলাৰ চাপানালাৰ প্ৰকৃতপ্ৰেমী যুৱক বিনোদ দুলু বৰাই এই বাৰ্মীজ পাইথন ডাল নিজ পত্নী আৰু বন বিভাগৰ সহযোগত শালনা আঞ্চলিক বন বিষয়াৰ কাৰ্যালয়ৰ অধীনৰ ৰেকা পাহাৰ অঞ্চলত উদ্ধাৰ কৰিছিল।
একাংশ লোকে জনাঞ্চলৰ সমীপতে এই প্ৰকাণ্ড অজগৰটোৰ অকস্মাৎ প্ৰত্যক্ষ কৰি প্ৰথম অৱস্থাত শংকিত হৈ পৰে যদিও ঘটনাৰ বিষয়ে জানিব পাৰি সেই ঠাইত দুলু বৰা উপস্থিত হৈ উদ্ধাৰ কৰে বিৰল প্ৰজাতিৰ অজগৰটো।
ইফালে উদ্ধাৰ হোৱা অজগৰটোৰ বিষয়ে প্ৰয়োজনীয় তথ্য আহৰণ কৰাৰ পাছত অজগৰটো নগাঁও কাৰ্বি আংলং সীমান্তৱৰ্তীৰ এখন বিশেষ ডাঠ বনাঞ্চলত মুক্ত কৰি দিয়া হয়।
অৱশ্যে এনে এডাল বৃহৎ আকাৰৰ বিৰল প্ৰজাতিৰ সৰীসৃপ শ্ৰীবৃদ্ধি হ’ব পৰাকৈ যে নগাঁও কাৰ্বিআংলং সীমান্তৱৰ্তী বৃহত্তৰ অঞ্চলত প্ৰয়োজনীয় উপযোগী এটা পৰিবেশ আছে তাক লৈ এতিয়া নিশ্চিন্ত হৈছে বন বিভাগৰ লগতে দুলু বৰাও।
ইফালে পত্নী মেঘ্না বৰা সহ বিনোদ দুলু বৰাই নগাঁও-কাৰ্বি আংলং জিলাৰ বৃহত্তৰ অঞ্চলত কেৱল হাতী-মানুহৰ সংঘাত নিৰ্মূলৰ চেষ্টা কৰাই নহয় বন্যপ্ৰাণীৰ উদ্ধাৰ আৰু সংৰক্ষণ বাবে কৰি অহা দীৰ্ঘদিনীয়া প্ৰচেষ্টাক ভূয়সী প্ৰশংসাৰে উপচাই পেলাইছে স্থানীয় ৰাইজ তথা দল-সংগঠনে।
