গুজৰাটৰ দলং খহি নদীত পৰা দুৰ্ঘটনাত মৃত্যুৰ সংখ্যা ১৪১ লৈ বৃদ্ধি, উদ্ধাৰ প্ৰায় ১৭৭জন
গুজৰাটৰ মোৰবী জিলাত ১৫০ বছৰ পুৰণি ওলোমা দলং খহি পৰাৰ ফলত সংঘটিত দুৰ্ঘটনাত কমেও ১৪১ জন লোক নিহত হৈছে। ব্ৰিটিছৰ দিনত নিৰ্মাণ কৰা এই দলংখন খহি পৰা ঘটনাত আন বহুলোক আহত হৈছে।
এতিয়ালৈকে প্ৰায় ১৭৭ জন লোকক উদ্ধাৰ কৰা হৈছে আৰু আৰু কেইজনমানৰ সন্ধানত অভিযান চলি আছে বুলি বিষয়াসকলে জানিবলৈ দিয়ে।
বাতৰি অনুসৰি, গুজৰাটৰ মোৰবী জিলাৰ মাচু নদীৰ ওপৰত থকা ১৫০ বছৰ পুৰণি ঐতিহাসিক ওলোমা দলংখন দেওবাৰে সন্ধিয়া প্ৰায় ৭.৪৫ বজাত খহি পৰে। মেৰামতিৰ পিছত চাৰি দিন আগতে দলংখন পুনৰ মুকলি কৰি দিয়া হৈছিল। দলংখন খহি পৰাৰ সময়ত ৫০০ তকৈও অধিক লোক দলংখনৰ ওপৰত আছিল।
দুৰ্ঘটনাটোৰ পিছত,প্ৰথমতে মৃত্যুৰ সংখ্যা ৬০ জন বুলি জনা গৈছিল। পিছলৈ নিশা, এই সংখ্যা বৃদ্ধি পায় আৰু ৯১জন বুলি জানিবলৈ দিয়া হয়। কিন্তু সোমবাৰে ৰাতিপুৱা বিষয়াসকলে জনায় যে মৃত্যুৰ সংখ্যা ১৩২ লৈ বৃদ্ধি পাইছে। শেহতীয়া খৱৰ অনুসৰি মৃতকৰ সংখ্যা ১৪১ জন হৈছে।
প্ৰধানমন্ত্ৰী নৰেন্দ্ৰ মোদীৰ ৰাষ্ট্ৰীয় সাহায্য পুঁজিৰ পৰা নিহত সকলৰ পৰিয়ালক ২ লাখ টকা আৰু আহতসকলৰ পৰিয়ালক ৫০,০০০ টকাৰ ক্ষতিপূৰণ ঘোষণা কৰা হৈছে। ৰাজ্য চৰকাৰে নিহতসকলৰ আত্মীয়ক ৪ লাখ টকা আৰু আহতসকলৰ পৰিয়ালক ৫০,০০০ টকাৰ অনুদান ঘোষণা কৰিছে।