অহা ১ জানুৱাৰীত অসমৰ মুখ্যমন্ত্ৰী ড০ হিমন্ত বিশ্ব শৰ্মাৰ জন্মদিন। বিজেপি তথা শৰ্মাৰ অনুৰাগীসকলৰ মাজত দেখিবলৈ পোৱা গৈছে উৎসুকতা। তাৰে ভিতৰত অত্যুৎসাহী অন্যতম এজন হিমন্ত বিশ্ব শৰ্মাৰ অন্ধ অনুৰাগী হ’ল গুৱাহাটীৰ নিমাতী কন্যাসদৃশ মেয়ৰ মৃগেন শৰণীয়া।
এইজন মৃগেন শৰণীয়াই যি গতিত হিমন্তবন্দনা আৰম্ভ কৰিছে তাক লৈ একাংশ মহানাগৰিক ক্ষুদ্ধ হৈ পৰিছে। কাৰণ কৰ সংগ্ৰহতেই ব্যস্ত থকা মেয়ৰ মৃগেন শৰণীয়াই চলিত কাৰ্যকালত গুৱাহাটীবাসীক দিয়া প্রতিশ্রুতিসমূহ পালন কৰিব পৰা নাই ৷ গুৱাহাটীবাসীৰ প্ৰধান খোৱা পানীৰ সমস্যা সমাধান কৰাত ব্যৰ্থ হৈছে মেয়ৰ শৰণীয়া । জি এছ ৰোডকে আদি কৰি গুৱাহাটীৰ প্ৰায় সকলোবোৰ ৰাস্তা খান্দি দিয়া হৈছে । যাৰ ফলত যাতায়তৰ বাবে গুৱাহাটীৰ বাসিন্দাসকল সমস্যাত ভুগিছে । তাৰ মাজত আছে গুৱাহাটীৰ কৃত্ৰিম বানৰ সমস্যা, কিন্তু এই সকলোবোৰ সমস্যালৈ পিঠি দি মুখ্যমন্ত্ৰীৰ স্বজন-তোষণত ব্ৰতী হৈছে মৃগেন।
উল্লেখ্য যে, যিখন অসম মূলুকত ৩ দিনীয়া কাৰ্যসূচীৰে মুখ্যমন্ত্ৰীৰ জন্মদিন উদযাপন কৰা হ’ব সেইখন অসমৰ অৰ্থনৈতিক অৱস্থা উদ্বেগজনক। ভাৰতীয় ৰিজার্ভ বেংকৰ প্রতিবেদন অনুসৰি ২০২৩-২৪বর্ষলৈকে অসম চৰকাৰে লোৱা ঋণৰ পৰিমাণ হ’ল ১ লাখ ৫০ হেজাৰ ৯০০ কোটি টকা। গতিকে এনে বৃহৎ পৰিমাণৰ ঋণৰ প্রতি লক্ষ্য ৰাখি উক্ত প্রতিবেদনখনত মূলতঃ নগদ ধন বিতৰণ তথা বিনামূলীয়া সামগ্রী বিতৰণৰ আঁচনিবোৰকে দায়বদ্ধ কৰা হৈছিল আৰু এনে অনুৎপাদনমূলক ব্যয় হ্রাস কৰি উৎপাদনমূলক কামত ব্যয় কৰিবলৈ পৰামর্শ দিয়া হৈছিল। একেদৰে অসম চৰকাৰক বাৰম্বাৰ সকীয়াই দিছিল ভাৰতৰ মহাগাণনিকে। কিন্তু অসম চৰকাৰে ৰিজার্ভ বেংক কর্তৃপক্ষ আৰু ‘কেগ’ৰ উদ্বেগক গুৰত্বহীন কৰি একমাত্র ভোটবেংকৰ স্বাৰ্থতে ঋণৰ ধন হিতাধিকাৰী আঁচনিত ব্যয় কৰিবলৈ গৈ প্রতিটো বিত্তীয় বর্ষতে মূলধনী শিতানৰ ব্যয় হ্রাস কৰিছে আনফালে উদযাপন কৰিবলৈ উদ্যত হৈছে জন্মদিন। কিন্তু প্ৰশ্ন হৈছে অসমৰ দৰে ৰাজ্যত এনে ঐশ্বৰ্য শোভা পাইনে? যিখন দেশৰ প্ৰধানমন্ত্ৰীয়ে নিজকে ‘ফকীৰ’ বুলি আখ্যা দিয়ে সেইখন দেশত একেটা ৰাজনৈতিক দলৰ এজন মুখ্যমন্ত্ৰী পৰ্যায়ৰ নেতাৰ বাবে ৩ দিনীয়া জন্মদিন উদযাপন কিমান দূৰ সমীচিন সেই প্ৰশ্ন সাধাৰণ ৰাইজৰ বাবে এৰিলোঁ।
