চিকিৎসক,পৰিচালকক আক্ৰমণ কৰা ডিকম চাহ বাগিচাৰ ১৭জন শ্ৰমিকক গ্ৰেপ্তাৰ
ডিব্ৰুগড়ৰ সমীপৰ ডিকম চাহ বাগিচাৰ ১৭ জন শ্ৰমিকক আৰক্ষীয়ে শনিবাৰে গ্ৰেপ্তাৰ কৰিছে। অলপতে হৈ যোৱা ধুমুহা ঢেৰেকনিৰ সময়ত বাগিচাত পাত তুলি থকা এগৰাকী মহিলাৰ মৃত্যুক কেন্দ্ৰ কৰি বাগিচাখনৰ চিকিৎসক, ফাৰ্মাচিষ্ট আৰু পৰিচালকক আক্ৰমণ কৰাৰ অভিযোগত শ্ৰমিককেইজনক গ্ৰেপ্তাৰ কৰা হৈছে।
‘’ডিকম চাহ বাগিচাত সংঘটিত আক্ৰমণৰ ঘটনাৰ সৈতে জড়িত ১৭ জন অভিযুক্তক আমি গ্ৰেপ্তাৰ কৰিছো। ডিকম আৰক্ষী চকীত তেওঁলোকৰ বিৰুদ্ধে ভাৰতীয় দণ্ডবিধিৰ ১৪৩/১৪৭/৩২৫/৪২৭/৫০৬/৩০৭ ধাৰাৰ অধীনত এটা গোচৰ ৰুজু কৰা হৈছে,’’- এগৰাকী আৰক্ষী বিষয়াই জানিবলৈ দিয়ে।
বাগিচাখনৰ পৰিচালনা গোষ্ঠীয়ে মৃত মহিলাগৰাকীৰ নিকট আত্মীয়লৈ ১ লাখ টকাৰ ক্ষতিপূৰণ দিয়াৰ কথা ঘোষণা কৰিছে।
বাগিচাখনৰ চিকিৎসক, ফাৰ্মাচিষ্ট আৰু পৰিচালকক আক্ৰমণ কৰা ঘটনাৰ পাছত বাগিচা কৰ্তৃপক্ষই অনিৰ্দিষ্ট কালৰ বাবে বাগিচাত তলাবন্ধ ঘোষণা কৰিছিল।
ঝালো ছুৰজান বুলি চিনাক্ত হোৱা মহিলাগৰাকীৰ ধুমুহা ঢেৰেকনিৰ সময়ত গছ এডাল উভালি পৰি গাত পৰাৰ পাছত মৃত্যু হৈছিল।
গছডাল উভালি গাত পৰাৰ সময়ত ঝালোৱে বাগিচাত পাত তুলি আছিল। তেওঁৰ লগত থকা আন তিনিজন কৰ্মী মংগ্ৰী কেওট, মানিক মুড়া আৰু মমতা মুড়া গুৰুতৰভাৱে আহত হয়।
শ্ৰমিকসকলে অভিযোগ কৰিছিল যে চিকিৎসকগৰাকীয়ে ‘’সময়মতে এম্বুলেন্স নপঠোৱা বাবেই মহিলা শ্ৰমিকগৰাকী মৃত্যুমুখত পৰে।‘’
উত্তেজিত শ্ৰমিকসকলে পাছত চিকিৎসকগৰাকীক বেয়াকৈ প্ৰহাৰ কৰে আৰু তেওঁক হাস্পাতলত ভৰ্তি কৰিবলগীয়া হৈছিল।
ঘটনাস্থলীত আৰক্ষী উপস্থিত হোৱাৰ পাছতহে পৰিস্থিতি নিয়ন্ত্ৰণলৈ আহিছিল। বাগিচা কৰ্তৃপক্ষই এই আক্ৰমণৰ ঘটনাৰ সৈতে জড়িত শ্ৰমিকসকলৰ বিৰুদ্ধে এক গোচৰ ৰুজু কৰিছিল আৰু শ্ৰমিকসকলে কাম কৰিবলৈ অস্বীকাৰ কৰাৰ পাছত বাগিচাখনত তলাবন্ধ ঘোষণা কৰা হৈছিল।