ডিমা হাচাও জিলাত ৰাষ্ট্ৰীয় ৰাজমাৰ্গ প্ৰাধিকৰণৰ অধীনত নিৰ্মীয়মাণ ইষ্ট ৱেষ্ট কৰিড’ৰ ৰাষ্ট্ৰীয় ঘাইপথ ২৭ৰ নিৰ্মাণ বিশেষকৈ জাতিংগা-লামডিং অংশৰ কাম প্ৰায় শেষ হোৱাৰ দিশত।
ইতিমধ্যে নিৰ্মাণকাৰ্য সম্পূৰ্ণ হোৱা বাবে এনকেচি নামৰ সংস্থাৰ পৰা মাইবাঙ-কালাচান্দ অংশ চমজি লৈছে এনএইচএআই (নাহাই)এ।
আনহাতে এই কাৰ্যসূচীত উপস্থিত থাকে নাহাইৰ নগাঁও প্ৰজেক্ট ইমপ্লিমেন্ট ইউনিটৰ প্ৰকল্প সঞ্চালক অলক কুমাৰ কনচালটেনচি সংস্থাৰ স্ম্যাকৰ টিম লিডাৰ ৰাম থ’টা, এনকেচিৰ পৰিচালন সঞ্চালক নৰেশ কুমাৰ আৰু এনকেচিৰ চি ই অ’ ৰহিত গুপ্তা।
ইফালে অবশিষ্ট জাতিংগা-ইনৃমবাংলো এএছ-২২ অধীনৰ ২৪ কিলোমিটাৰ নিৰ্মাণকাৰ্যৰ কামো ক্ষিপ্ৰভাৱে আগ বাঢ়িছে বুলি জানিব পৰা গৈছে। বিশেষকৈ জাতিংগাৰ সমীপৱৰ্তী নিউ লেইকুল গাঁৱৰ কাষত থকা ৰাষ্ট্ৰীয় ঘাইপথৰ এছ-কাৰ্ভ এলেকাৰ নিৰ্মাণকাৰ্য যুদ্ধকালীন তৎপৰতাৰে আগ বাঢ়িছে।
উক্ত কামৰ চোৱা-চিতাৰ দায়িত্বত আছে ঠিকাদাৰি সংস্থা এনকেচিৰ প্ৰজেক্ট মেনেজাৰ বাসুদেৱ পন্থী। বিশেষকৈ পথৰ কাষৰ পানী যোৱা নলা নিৰ্মাণত অধিক গুৰুত্ব দিয়া হৈছে। কাৰণ বাৰিষা বৰষুণৰ সময়চোৱাত এই অংশ অধিক শোচনীয় হৈ পৰে। যাৰ ফলত এই অংশইদি বাৰিষা বৰষুণৰ সময়চোৱাত যানবাহন চলাচলত ব্যাপক সমস্যাৰ সৃষ্টি হয়।
গতিকে এইবাৰ যাতে এনে সমস্যা নহয় তাৰ প্ৰতি লক্ষ্য ৰাখি আগতীয়াকৈ ব্যৱস্থা হাতত লোৱা হৈছে আৰু দিনে-নিশাই সমান্তৰাল ভাৱে ইয়াক সম্পূৰ্ণ কৰি তোলাৰ বাবে কাম চলি আছে বুলি জানিব পৰা গৈছে।
এনকেচিৰ প্ৰজেক্ট মেনেজাৰ বাসুদেৱ পন্থীয়ে নৰ্থ ইষ্ট নাওক জানিবলৈ দিয়া অনুসৰি বাৰিষাৰ পূৰ্বেই এই অংশ সচল কৰি তোলা হ’ব।
