অসমৰ সাংবাদিকক কোভিডৰ প্ৰথমশাৰীৰ যুদ্ধা হিচাপে ঘোষণা কৰা হৈছে। গুৱাহাটী প্ৰেছ ক্লাৱে সংবাদ মাধ্যমলৈ প্ৰেৰণ কৰা এক বিবৃতিত এইদৰে কোৱা হৈছে।
গুৱাহাটী প্ৰেছ ক্লাবৰ সভাপতি মনোজ নাথ আৰু সম্পাদক সঞ্জয় ৰায়ৰ স্বাক্ষৰিত বিবৃবিটোত লগতে কোৱা হৈছে যে ১৮-৪৪ বছৰৰ সাংবাদিকক প্ৰতিকীৰূপে দিয়া হ’ব ভেকচিন।
গুৱাহাটী প্ৰেছ ক্লাৱত বুধবাৰে পুৱা ৯.৩০ মিনিটৰ পৰা আৰম্ভ হ’ব এই ভেকচিনেচন কেম্প।
অসম চৰকাৰৰ নিৰ্দেশ মৰ্মে ১০০ জন সাংবাদিকেহে প্ৰাৰম্ভিক পৰ্যায়ত ল’ব পাৰিব এই ভেকচিন।
বিভিন্ন খবৰৰ সন্ধানত যিসকলে সমুখৰ পৰা যুঁজ দি আহিছে অৰ্থাৎ যিসকলে বিভিন্ন স্থানলৈ গৈ বা-বাতৰি সংগ্ৰহ কৰিছে, সেইসকল সাংবাদিক, ফটো সাংবাদিক, ভিডিঅ’ জাৰ্ণালিষ্টকহে প্ৰাধান্য দিয়া হ’ব বুলিও কোৱা হৈছে বিবৃতিটোত।
সেয়েহে গুৱাহাটী প্ৰেছ ক্লাবে প্ৰতিটো সংবাদ প্ৰতিষ্ঠানক প্ৰতিটো সংবাদ মাধ্যমৰ মাত্ৰ দুজন সাংবাদিকক তেওঁলোকে নিৰ্বাচিত কৰি প্ৰাৰম্ভিক পৰ্যায়ৰ ভেকচিন লোৱাৰ ব্যৱস্থা কৰিবলৈ অনুৰোধ জনাইছে।
আনহাতে ভেকচিনৰ বাবে নিৰ্বাচিত প্ৰতিজন সাংবাদিকে co-win , আৰোগ্য সেতু এপত পঞ্জীয়ন কৰিব লাগিব নিজৰ নাম আৰু পঞ্জীয়নৰ নাম্বাৰটো গুৱাহাটী প্ৰেছ ক্লাবৰ ৬০২৬৬৭২৮১৭ নাম্বাৰলৈ প্ৰেৰণ কৰিব লাগিব বুলিও জনাইছে প্ৰেছ ক্লাৱৰ বিবৃতিটোত।
ইফালে ভেকচিন ল’বলৈ যোৱাৰ সময়ত সাংবাদিকসকলে সাংবাদিকৰ পৰিচয় পত্ৰ আৰু বয়সৰ প্ৰমাণ পত্ৰ লৈ যোৱাতো বাধ্যতামূলক বুলি কোৱা হৈছে।
