কোকৰাঝাৰ আৰক্ষীয়ে শুকুৰবাৰে নিশা অভিযান চলাই ১৮ টা গৰু উদ্ধাৰ কৰাৰ লগতে এগৰাকী ব্যক্তিক আটক কৰে।
বিশেষ সূত্ৰৰ পৰা লাভ খৰা খবৰৰ ভিত্তিত ধুবুৰী আৰক্ষীৰ এটা দলে কাজিগাঁও আৰক্ষী চকীৰ অন্তৰ্গত বগৰীবাৰী আৰু নতুন পানবাৰী অঞ্চলত অভিযান চলাই অবৈধভাৱে সৰবৰাহ কৰিবলৈ নিয়া অৱস্থাত গৰু কেইটা উদ্ধাৰ কৰিবলৈ সক্ষম হয়।
আৰক্ষীৰ অভিযানকাৰী দলটোৱে এই ঘটনাৰ সৈতে জড়িত থকা হাছেম আলী নামৰ এগৰাকী ব্যক্তিক আটক কৰিছে।
হাছেম আলীৰ ঘৰ নতুন পানবাৰী অঞ্চলত। আৰক্ষীয়ে ঘটনাস্থলীৰ পৰা দুচকীয়া বাহনৰ লগতে মোবাইল ফোনো জব্দ কৰে।
আৰক্ষীয়ে সমগ্ৰ ঘটনা সন্দৰ্ভত এটা গোচৰ ৰুজু কৰি অধিক তথ্যৰ বাবে তদন্ত অব্যাহত ৰাখিছে বুলি জানিবলৈ দিয়ে।
ধুবুৰী জিলাত গৰু সৰবৰাহকাৰীৰ চক্ৰ দীৰ্ঘদিনৰ পৰা অধিক সক্ৰিয় হৈ আছে। বিগত সময়ছোৱাত আৰক্ষী আৰু বি এছ এফৰ অভিযানত জিলাখনৰ বিভিন্ন স্থানত বহু অবৈধভাৱে সৰবৰাহ কৰিব বিচৰা গৰু জব্দ হৈছে।
