বিষয় শিক্ষকৰ গালত ১৮ টা বোন্দা চৰ প্ৰধান শিক্ষকৰ : কিন্তু কিয়?

গুজৰাটৰ এখন বিদ্যালয়ত সংঘটিত হৈছে এক চাঞ্চল্যকৰ ঘটনা। এই ঘটনাই যথেষ্ট আলোড়নৰ সৃষ্টি কৰিছে।

গুজৰাটৰ ভাৰুচ জিলাৰ নৱ্যুগ স্কুলত সংঘটিত হৈছে এই ঘটনা। বিদ্যালয়খনৰ অধ্যক্ষ হিতেন্দ্ৰ সিং থাকৰে আৰু বিজ্ঞান শিক্ষক ৰাজেন্দ্ৰ পৰমাৰৰ মাজত সৃষ্টি হয় এক ভয়ানক কাজিয়া।

ঘটনাৰ ভিডিঅ’ইতিমধ্যে ভাইৰেল হৈ পৰিছে সামাজিক মাধ্যমত। য’ত হিতেন্দ্ৰই ৰাজেন্দ্ৰক চোচৰাই টানি নিয়াৰ চেষ্টা কৰা দেখা গৈছে। তাৰ পিছত এবাৰ দুবাৰ নহয়, ১৮ বাৰ চৰ মাৰে অধ্যক্ষগৰাকীয়ে। এই দৃশ্য সেই কোঠাটোৰ চিচিটিভিত বন্দী হৈছিল।

হিতেন্দ্ৰৰ দাবী, ছাত্ৰ-ছাত্ৰীৰ লগত ৰাজেন্দ্ৰৰ আচৰণ সঠিক নহয়। ক্লাছত অসৎ আচৰণ আৰু ছাত্ৰ-ছাত্ৰীক নিৰ্যাতন চলোৱাৰ অভিযোগ আছে ৰাজেন্দ্ৰৰ বিৰুদ্ধে। সেই বিষয়ে ৰাজেন্দ্ৰই তেওঁৰ লগত আলোচনা কৰি থাকোঁতে পুনৰ অভদ্ৰ আচৰণ প্ৰদৰ্শন কৰে।

তেওঁ আৰু দাবী কৰে যে কেতিয়াবা তেওঁ বহু ছাত্ৰ-ছাত্ৰীক নিজৰ ঘৰলৈ নিমন্ত্ৰণ কৰে। অৱশ্যে এই সকলো অভিযোগ অস্বীকাৰ কৰিছে ৰাজেন্দ্ৰই। সমগ্ৰ ঘটনাৰ বাবে তেওঁ হিতেন্দ্ৰক দোষাৰোপ কৰে। চিচিটিভিৰ ফুটেজ ভাইৰেল হোৱাৰ পিছতে শিক্ষা বিভাগে তদন্ত আৰম্ভ কৰিছে। কিয় এনে দুৰ্ভাগ্যজনক ঘটনা সংঘটিত হ’ল সেই বিষয়ে জানিবলৈও জৰুৰীভাৱে এটা প্ৰতিবেদন আহ্বান কৰা হৈছে।