গুৱাহাটী মহানগৰীৰ চান্দমাৰী অঞ্চলত ৰখাই থোৱা অৱস্থাতে বিধ্বংসী অগ্নিকাণ্ডৰ সূত্ৰপাত হৈছে এখন যাত্ৰীবাহী ৰে’লত। এই ভয়ংকৰ অগ্নিকাণ্ডত ভস্মীভূত হৈছে ৰে’লখনৰ দুটা খালী ডবা।
আজি সন্ধিয়া প্ৰায় ৬.৩০ বজাত সংঘটিত হয় এই ঘটনা। ঘটনা সন্দৰ্ভত এন এফ ৰে’লৱেৰ এগৰাকী বিষয়াই জানিবলৈ দিয়া মতে, যাত্ৰীবাহী ৰে’লখনৰ এটা খালী ডবা আকস্মিকভাৱে জ্বলি উঠিছিল।
এই অগ্নিকাণ্ডত এটা ডবা সম্পূৰ্ণৰূপে ভস্মীভূত হোৱাৰ বিপৰীতে আন এটা ডবা আংশিকভাৱে ক্ষতিগ্ৰস্ত হৈছে। এগৰাকী প্ৰত্যক্ষদৰ্শীৰ মতে, প্ৰথমে এটা ডবাত জুই লগাৰ কেইমিনিটমান পিছতে জুইৰ লেলিহান শিখা আনটো ডবালৈও বিয়পি পৰে।
অৱশ্যে এই ঘটনাত কোনো লোক আহত হোৱা নাই বুলি এন এফ ৰে’লৱেৰ বিষয়াগৰাকীয়ে সংবাদ মাধ্যমৰ আগত উল্লেখ কৰিছে।
বিষয়াগৰাকীয়ে সদৰী কৰা মতে, ঘটনাৰ সময়ত ডবাকেইটা কোনো ৰে’লৰ সৈতে সংলগ্ন কৰা হোৱা নাছিল বাবে সেই সময়ত কোনো যাত্ৰী ৰে’লৰ ভিতৰত নাছিল।
অগ্নি নিৰ্বাপনৰ বাবে অগ্নি নিৰ্বাপক বাহিনীৰ পাঁচখনকৈ বাহন ঘটনাস্থলীত উপস্থিত হয় আৰু জুই নিয়ন্ত্ৰণলৈ আনে বুলি তেওঁ লগতে কয়।
