যুদ্ধ জৰ্জৰিত ইজৰাইলৰ শ্বাসৰুদ্ধকৰ পৰিস্থিতিৰ মাজৰ পৰা সুকলমে ভাৰতলৈ ঘূৰি আহিল ২০০ জন প্ৰবাসী ভাৰতীয়।
শুকুৰবাৰে পুৱা ‘অপাৰেচন অজয়’ৰ জৰিয়তে কেন্দ্ৰীয় চৰকাৰে বিশেষ চাৰ্টাৰ্ড বিমানেৰে ইজৰাইলত বসবাস কৰা একাংশ ভাৰতীয়ক দেশলৈ ঘূৰাই আনে।
যোৱা শনিবাৰে হামাছ-ইজৰাইল যুদ্ধ আৰম্ভ হোৱাৰ পৰাই সেই দেশত বসবাস কৰা ভাৰতীয়সকলক দেশলৈ প্ৰত্যাৱৰ্তনৰ ক্ষেত্ৰত কেন্দ্ৰ সক্ৰিয় হৈ পৰিছে। সেই উদ্দেশ্যে “অপাৰেচন অজয়” আৰম্ভ কৰা হৈছে।
শুকুৰবাৰে পুৱা কেন্দ্ৰীয় মন্ত্ৰী ৰাজীৱ চন্দ্ৰশেখৰে উভতি অহা প্ৰবাসীসকলক সম্ভাষণ জনায়।
শুকুৰবাৰে ‘অপাৰেচন অজয়’ৰ অধীনত ইজৰাইলৰ ছাত্ৰ-ছাত্ৰী আৰু কৰ্মচাৰীকে ধৰি মুঠ ২০০ ভাৰতীয়ক লৈ দিল্লী বিমানবন্দৰত এখন বিশেষ চাৰ্টাৰ্ড বিমান অৱতৰণ কৰে।
কেন্দ্ৰীয় বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচিয়ে বৃহস্পতিবাৰে কয় যে বৰ্তমান প্ৰায় ১৮ হাজাৰ ভাৰতীয়ই কৰ্ম বা অধ্যয়নৰ বাবে ইজৰাইলত বাস কৰে। আনহাতে পশ্চিম পাৰত ১০-১২ জন ভাৰতীয় আৰু গাজাত ৩-৪ জন ভাৰতীয় বাস কৰে।
