ভাৰতীয় ক্ৰিকেট দলৰ বিস্ফোৰক অপেনিং বেটছমেন ৰোহিত শৰ্মা আই চি চিৰ ‘বৰ্ষশ্ৰেষ্ঠ এদিনীয়া ক্ৰিকেটাৰ’ হিচাপে নিৰ্বাচিত হৈছে।
বুধবাৰে আন্তঃৰাষ্ট্ৰীয় ক্ৰিকেট পৰিষদে ঘোষণা কৰা বঁটা সমূহত ৰোহিত শৰ্মাৰ উপৰি ভাৰতীয় ক্ৰিকেট দলৰ অধিনায়ক বিৰাট কোহলী আৰু বেগী বলাৰ দীপক চাহাৰো নিৰ্বাচিত হয়।
উল্লেখ্য যে ৰোহিত শৰ্মাই ২০১৯ বিশ্বকাপত ৰেকৰ্ড সংখ্যক ৫ টা শতক অৰ্জন কৰাৰ লগতে এদিনীয়াত মুঠ ৭ টা শতক অৰ্জন কৰিছে। তদুপৰি ২০১৯ বৰ্ষত সৰ্বাধিক ১৪৯০ ৰান সংগ্ৰহ কৰিছে।
যোৱা বছৰটোত ৰোহিতে ২৮ খন এদিনীয়াত অংশ লৈ ৫৭.৩০ এভাৰেজৰ সহায়ত উক্ত উপলব্ধি লাভ কৰে।
ইফালে বিৰাট কোহলীক ‘2019 Spirit Of Cricket Award’ ৰ বাবে নিৰ্বাচিত কৰা হয়।
‘প্লেয়াৰ অব দ্যা ইয়েৰ’ৰ সন্মান লাভ কৰে ইংলেণ্ডৰ ষ্টাৰ অলৰাউণ্ডাৰ তথা বিশ্বাকাপ বিজয়ী দলৰ সদস্য বেন ষ্টোকছে। যোৱা বছৰটোত এইগৰাকী ক্ৰিকেটাৰে বিশ্বকাপ জয়ী কৰোৱাৰ লগতে কেইবাটাও গুৰুত্বপূৰ্ণ ইনিংছেৰে ইংলেণ্ডৰ বিজয়ত গুৰুত্বপূৰ্ণ ভূমিকা লৈছে।
আই চি চি টেষ্ট আৰু এদিনীয়া দলৰ অধিনায়ক হিচাপে নিৰ্বাচিত হয় ভাৰতীয় ক্ৰিকেট দলৰ অধিনায়ক বিৰাট কোহলী।
কোহলীৰ উপৰি ভাৰতৰ চাৰিগৰাকী ক্ৰিকেটাৰে আই চি চিৰ টেষ্ট আৰু এদিনীয়া দলত স্থান লাভ কৰে। টেষ্টত দ্বিশতক অৰ্জন কৰা মায়ংক আগৰৱালক টেষ্টত আৰু ৰোহিত শৰ্মা, মহম্মদ ছামি আৰু বাঁওহতীয়া লেগ স্পীনাৰ কুলদীপ যাদৱক এদিনীয়া দলত নিৰ্বাচিত কৰিছে।
‘ICC Men’s Emerging Cricketer’ হিচাপে নিৰ্বাচিত হৈছে অষ্ট্ৰেলিয়াৰ মাৰ্নছ লাবুচানে। লাবুচানেই ১৯ বৰ্ষটোত গড়ে ৬৪.৯৪ ৰানৰ সহায়ত টেষ্ট ক্ৰিকেটত সৰ্বাধিক ১১০৪ ৰান সংগ্ৰহ কৰে।
অষ্ট্ৰেলিয়া দলৰে বেগী বলাৰ পেট কামিন্সে লাভ কৰিছে ‘টেষ্ট ক্ৰিকেটাৰ অব দ্যা ইয়েৰ’ বঁটা। তেওঁ যোৱা বছৰটোত সৰ্বাধিক ৫৯ টা উইকেট লাভ কৰিছে।
আনহাতে যোৱা বছৰ নৱেম্বৰ মাহত অনুষ্ঠিত এখন টি-২০ মেচত ভাৰতৰ বেগী বলাৰ দীপক চাহাৰে ৭ ৰানৰ বিনিময়ত লাভ কৰিছিল ৬ টা উইকেট আৰু সেইটো আছিল আন্তঃৰাষ্ট্ৰীয় টি-২০ৰ সৰ্বশ্ৰেষ্ঠ প্ৰদৰ্শন। চাহাৰৰ সেই স্পেলটোক আই চি চিয়ে ‘T20I Performance of the Year’ হিচাপে ঘোষণা কৰে।
বছৰটোৰ শ্ৰেষ্ঠ এম্পায়াৰ হিচাপে নিৰ্বাচিত হৈছে ৰিচাৰ্ডছ ইলিংৱৰ্থ। আনহাতে স্কটলেণ্ডৰ কাইল কোৱেটজৰক বৰ্ষটোৰ ‘Associate Cricketer of the Year’ হিচাপে নিৰ্বাচিত কৰে।
