চাকৰিৰ প্ৰলোভনেৰে ডিব্ৰুগড়ৰ যুৱতীক হাৰিয়ানাত বিক্ৰী: বলপূৰ্বকভাৱে দিয়া হ’ল বিয়া
মানৱ সৰবৰাহ চক্ৰৰ ফান্দত পৰিছে ডিব্ৰুগড়ৰ এগৰাকী ২২ বছৰীয়া যুৱতী। মহানগৰীত চাকৰিৰ প্ৰতিশ্ৰুতিৰে প্ৰলোভিত কৰি ২২ বছৰীয়া যুৱতীগৰাকীক বিক্ৰী কৰা হৈছে হাৰিয়ানাত আৰু ৰাজ্যখনৰ জিন্দ জিলাত বলপূৰ্বকভাৱে স্থানীয় এগৰাকী ব্যক্তিৰ সৈতে বিয়াত বহিবলৈ বাধ্য কৰা হৈছে।
এই সন্দৰ্ভত ভুক্তভোগী যুৱতীগৰাকীয়ে আৰক্ষীক দিয়া এজাহাৰত অভিযোগ কৰা মতে ডিব্ৰুগড় জিলাৰে লক্ষ্মী নামৰ আন এগৰাকী মহিলাৰ সৈতে তেওঁৰ চিনাকি আছিল। এই লক্ষ্মী নামৰ মহিলাগৰাকী জিন্দৰে বাসিন্দা বলজীতৰ সৈতে বিবাহপাশত আবদ্ধ হৈছিল।
যুৱতীগৰাকীয়ে উল্লেখ কৰা মতে, লক্ষ্মীয়ে তেওঁক চাকৰি দিয়াৰ অজুহাতেৰে জিন্দলৈ লৈ গৈছিল আৰু পিছত স্থানীয় কবিতা নামৰ এগৰাকী মহিলাক ২৫ হাজাৰ টকাত বিক্ৰী কৰিছিল।
বিগত ৩ জুনত কবিতাই সন্দীপ ওৰফে কালা নামৰ ব্যক্তিগৰাকীৰ সৈতে তেওঁক বিয়াত বহিবলৈ বাধ্য কৰাইছিল বুলি অভিযোগ কৰিছে যুৱতীগৰাকীয়ে। জিন্দৰ পৰা কোনোমতে পলায়ন কৰি এতিয়া আৰক্ষীৰ কাষ চাপিছে বুলি যুৱতীগৰাকীয়ে দাবী কৰিছে।
যুৱতীগৰাকীৰ এই অভিযোগ সন্দৰ্ভত স্থানীয় এগৰাকী আৰক্ষী বিষয়াই বলপূৰ্বকভাৱে বিবাহ কৰোৱাৰ অভিযোগত অভিযুক্ত তিনিগৰাকী লোকৰ বিৰুদ্ধে গোচৰ ৰুজু কৰা হৈছে বুলি জানিবলৈ দিয়ে।
আৰক্ষীয়ে সদৰী কৰা অনুসৰি অভিযুক্ত লক্ষ্মী, কবিতা আৰু সন্দীপৰ বিৰুদ্ধে অপহৰণ, মানৱ সৰবৰাহৰ লগতে অন্যান্য প্ৰাসংগিক অভিযোগত গোচৰ ৰুজু কৰি তদন্ত আৰম্ভ কৰা হৈছে।