টাইমছ হায়াৰ এড্যুকেশ্যনৰ উদীয়মান অৰ্থনীতিৰ অন্তৰ্ভুক্ত ৰাষ্ট্ৰসমূহৰ অন্তৰ্গত শিক্ষানুষ্ঠানসমূহৰ ভিতৰত তেজপুৰ বিশ্ববিদ্যালয়ে ৯৯ সংখ্যক স্থান লাভ কৰিছে।
টাইমছ হায়াৰ এড্যুকেশ্যনৰ তালিকাত ‘এফ টি এছ ই’য়ে শ্ৰেণীভুক্ত কৰা শিক্ষানুষ্ঠানসমূহক সামৰি লোৱা হয়।
উল্লেখ্য যে এই তালিকাত গুৱাহাটী আই আই টিয়ে ১১৪ সংখ্যক স্থান লাভ কৰিছে।
ভাৰতত ইণ্ডিয়ান ইন্সটিটিউট অব ছাইন্স, আই আই টি বোম্বে আৰু আই আই টি খড়গপুৰৰ পিছতে তেজপুৰ বিশ্ববিদ্যালয়ক গৱেষণা বিভাগত ৪ৰ্থ নম্বৰ স্থান প্ৰদান কৰা হৈছে। তেজপুৰ বিশ্ববিদ্যালয়ক সমগ্ৰ ভাৰত বিভাগত ৮ নং স্থান প্ৰদান কৰা হৈছে।
টাইমছ হায়াৰ এড্যুকেশ্যনৰ ইমাৰ্জিং ইক’নোমিকছ ইউনিভাৰ্ছিটিত অন্তৰ্ভুক্ত হোৱা মানে এই বিশ্ববিদ্যালয়খন ‘টাইমছ হায়াৰ এড্যুকেশ্যনে’ বিশ্লেষণৰ বাবে বাচনি কৰা নিৰ্দিষ্ট (‘এফ টি এছ ই’য়ে শ্ৰেণীভুক্ত কৰা) ৪২খন দেশৰ শীৰ্ষ ৩৭৮খন বিশ্ববিদ্যালয়ৰ অন্তৰ্ভুক্ত হৈছে।
টাইমছ হায়াৰ এড্যুকেশ্যনে ৫০ খন দেশৰ শিক্ষানুস্থানসমূহক ‘উদীয়মান অৰ্থনীতি’ (emerging economies) (উচ্চ আৰু মাধ্যমিক) বা সীমান্ত অৰ্থনীতি (frontier economies) শিক্ষানুষ্ঠান হিচাপে বিৱেচনা কৰে যদিও ৪২খন দেশৰ শিক্ষানুস্থানেহে শীৰ্ষ ৩৭৮ স্থান লাভ কৰিবলৈ সক্ষম হৈছে।
বিগত বছৰৰ ২৭ খনৰ পৰা এই বছৰ ৪২খন শিক্ষানুস্থানেৰে ভাৰত দ্বিতীয় অধিক সংখ্যক প্ৰতিনিধিত্ব কৰা দেশ হিচাপে পৰিগণিত হৈছে। বিগত বছৰৰ ৫২ খনৰ পৰা চলিত বৰ্ষত ৬৩ শিক্ষানুস্থানেৰে চীন তালিকাৰ শীৰ্ষত আছে। পিকিং বিশ্ববিদ্যালয় তালিকাৰ শীৰ্ষস্থান লাভ কৰিছে আৰু ছিংহুৱা বিশ্ববিদ্যালয়ে দ্বিতীয় স্থানত আছে।
টাইমছ হায়াৰ এড্যুকেশ্যনৰ তালিকাত প্ৰত্যেকখন মূল উদ্দেশ্য-বিশ্ববিদ্যালয়ৰ শিক্ষণ, গৱেষণা, জ্ঞান প্ৰদান আৰু আন্তঃজাতিক দৃষ্টিভংগীৰ ওপৰত ১৩ টা কঠোৰ দক্ষতা সূচক ব্যৱহাৰ কৰা হয়।‘উদীয়মান অৰ্থনীতি’ শ্ৰেণীৰ অন্তৰ্গত দেশসমূহৰ লক্ষণ আৰু উন্নয়নৰ অগ্ৰাধিকাৰসমূহক অধিক ভালকৈ প্ৰতিফলিত কৰা প্ৰণালীবিধিৰ যত্নেৰে জোখ লোৱা হয়।
তাৰোপৰি, তালিকা প্ৰস্তুৰ সময়ত এখন বিশ্ববিদ্যালয়ৰ সৈতে থকা উদ্যোগসমূহৰ সম্পৰ্ক আৰু আন্তঃজাতিক দৃষ্টিভংগীক অগ্ৰাধিকাৰ দিয়া হয়।
এই কৃতকাৰ্যতা লাভত তেজপুৰ বিশ্ববিদ্যালয়ৰ উপাচাৰ্য অধ্যাপক বিনোদ কুমাৰ জৈনে শিক্ষাৰ্থী, শিক্ষক, কৰ্মচাৰীসকলক শুভেচ্ছা জনায় আৰু ভৱিষ্যতে আৰু অধিক কৃতকাৰ্যতা লাভ কৰাৰ বাবে আৰু অধিক কঠোৰ পৰিশ্ৰম কৰাৰ বাবে আহ্বান জনায়।
