উত্তৰ- পূবৰ অন্যতম ৰাজ্য মিজোৰামত প্ৰাধান্য বিস্তাৰ কৰাৰ বাবে কৌশল অব্যাহত ৰাখি কেৰালা বিজেপিৰ সভাপতি কে ৰাজশেখৰণক পাহাৰীয়া ৰাজ্যখনৰ ৰাজ্যপাল হিচাপে নিযুক্তি দিছে কেন্দ্ৰীয় চৰকাৰে।
উল্লেখযোগ্য যে অহা বৰ্ষত অনুষ্ঠিত হ’ব মিজোৰাম বিধানসভাৰ নিৰ্বাচন।সেয়েহে ৰাজ্যখনত সাংগঠনিক ভেটি শক্তিশালী কৰাৰ উদ্দেশ্যে বিজেপিয়ে এই কৌশল গ্ৰহণ কৰিছে বুলি চৰ্চিত হৈছে ভিন্ন মহলত।
প্ৰসংগক্ৰমে উল্লেখযোগ্য যে অহা ২৮ মে’ত মিজোৰামৰ বৰ্তমানৰ ৰাজ্যপাল লেফটেনেণ্ট জেনেৰেল (অৱসৰপ্ৰাপ্ত) নিৰ্ভয় শৰ্মাৰ কাৰ্যকালৰ অন্ত পৰিব।
‘৭০ৰ দশকৰ পৰা ৰাষ্ট্ৰীয় স্বয়ং সেৱক সংঘৰ সৈতে জড়িত হৈ পৰা কে ৰাজশেখৰণ সংঘৰ এগৰাকী একনিষ্ট কৰ্মী হিচাপে পৰিচিত।২০১৫ চনৰ ১৮ ডিচেম্বৰৰ পৰা কেৰালা বিজেপিৰ সভাপতি হিচাপে দায়িত্ব গ্ৰহণ কৰি থকা ৰাজশেখৰণক নিৰ্বাচনৰ পূৰ্বে মিজোৰামৰ ৰাজ্যপাল হিচাপে নিযুক্তি দিয়াক লৈ এতিয়া তীব্ৰ প্ৰতিক্ৰিয়াৰ সৃষ্টি হৈছে সৰ্বত্ৰ।
প্ৰসংগক্ৰমে উল্লেখযোগ্য যে উত্তৰ- পূবৰ প্ৰায়কেইখন ৰাজ্যতে সম্প্ৰতি আধিপত্য বিস্তাৰ কৰিবলৈ সক্ষম হৈছে বিজেপিয়ে। সেয়েহে দীৰ্ঘদিনৰ পৰা কংগ্ৰেছৰ দখলত থকা পাহাৰীয়া ৰাজ্যখনক নিজৰ দখললৈ আনিবলৈ এইদৰে তৎপৰতা গ্ৰহণ কৰিছে কেন্দ্ৰত শাসনাধিষ্ঠ দলটোৱে। অৱশ্যে বিজেপিৰ এই ৰণকৌশলৰ পৰিণতি কি হয় সেয়া সময়হে নিৰ্ধাৰণ কৰিব।
