যোৰহাট জিলাৰ পৰা আহি ভাৰত-বাংলা সীমান্ত অতিক্ৰম কৰিব বিচৰা ২৬জন বাংলাদেশী নাগৰিকক দেওবাৰে ধুবুৰীত ৰখাই কোৱাৰেন্টাইন কৰা হৈছে।
আৰক্ষীয়ে বাংলাদেশীকেইজনক ধুবুৰী জিলাৰ প্ৰৱেশ পথ বহলপুৰৰ ১৭ নং ৰাষ্ট্ৰীয় ঘাইপথ (নতুন)ৰ ওচৰত ৰখায়।
বিলাসীপাৰাৰ মহকুমা আৰক্ষী বিষয়া বি দাসে কয়,’’পুৱা প্ৰায় ৭বজাত বহলপুৰৰ ওচৰত নিয়মীয়া চেকিঙৰ সময়ত দুখন ভাড়া কৰা গাড়ীৰে অহা পাৰ্ছপ’ৰ্ট আৰু ভিছা থকা ২৬জন বাংলাদেশী নাগৰিকক বিষয়াসকলে ৰখায়।‘’
‘’তেওঁলোকক পাছত চাপৰত কোৱাৰেন্টাইন কৰা হয়,’’-আৰক্ষী বিষয়াগৰাকীয়ে কয়।
বাংলাদেশী নাগৰিককেইজনে যদিও দাবী কৰিছে যে তেওঁলোক প্ৰব্ৰজিত শ্ৰমিক আৰু যোৰহাটত মাছ মৰা কামত নিয়োজিত আছিল, কিন্তু তদন্তত জড়িত এগৰাকী বিষয়াই কয় যে ‘’তেওঁলোকে পৰ্যটকৰ ভিছা লৈহে ভ্ৰমণ কৰিছিল’’।
ইপিনে, তেওঁলোকে ভাড়া কৰি অনা AS01-HC-5934 আৰু AS04-BC-1383 নম্বৰৰ পঞ্জীয়ন থকা বাহন দুখন আৰক্ষীয়ে জব্দ কৰিছে।
বাহন দুখনৰ পাছ যোৰহাট জিলা প্ৰশাসনে ইচ্ছ্যু কৰিছিল।
আনহাতে, আন্ত: জিলা ভ্ৰমণৰ সন্দৰ্ভত যোৰহাট জিলা কৰ্তৃপক্ষই ধুবুৰীৰ প্ৰশাসনৰ সৈতে যোগাযোগ নকৰাৰ অভিযোগ উঠিছে।
ধুবুৰীৰ উপায়ুক্ত অনন্ত লাল গিয়ানীয়ে কয় যে বাংলাদেশী নাগৰিককেইজনৰ সঠিকভাৱে পৰীক্ষা কৰাবলৈ স্বাস্থ্য বিভাগৰ বিষয়াসকলক নিৰ্দেশ দিয়া হৈছে।
তেওঁ কয় যে আৰক্ষী বিভাগক ভ্ৰমণকাৰীকেইজনৰ পাছপ’ৰ্ট, ভিছা আৰু আন নথিসমূহ তথা তেওঁলোকৰ ভ্ৰমণৰ উদ্দেশ্য পৰীক্ষা কৰি চাবলৈ নিৰ্দেশ দিয়া হৈছে।
‘’বিষয়টো তদন্তৰ অধীনত আছে আৰু তদন্ত সম্পূৰ্ণ হোৱাৰ পাছতেই আমি নিয়ম আৰু আইন অনুসৰি উপযুক্ত কাৰ্যব্যৱস্থা গ্ৰহণ কৰিম,’’-গিয়ানীয়ে নৰ্থইষ্ট নাওৰ আগত এইদৰে কয়।
