এক, দুই বা কেৱল তিনি অংকৰ ঘৰত নহয়, দুই শতাধিকৰো অধিক কোটিপতি প্ৰাৰ্থীয়ে ২০২১ চনৰ অসম বিধানসভা নিৰ্বাচনত প্ৰতিদ্বন্দ্বিতা কৰিছে।
সংসাদ সংস্থা পিটিআইৰ তথ্য অনুসৰি অসমত ২৬৪ গৰাকী কোটিপতি প্ৰাৰ্থীয়ে এইবাৰ নিৰ্বাচনত প্ৰতিদ্বন্দ্বিতা কৰিছে।
এই হিচাপত ১২৬ টা বিধানসভা সমষ্টিৰ ৯৪৬ গৰাকী প্ৰাৰ্থীৰ ভিতৰত কোটিপতি প্ৰাৰ্থীৰ শতকৰা হাৰ হৈছে ২৭.৯০।
ইয়াৰ ভিতৰতে আটাইতকৈ সম্পদশালী প্ৰাৰ্থীগৰাকী হৈছে কোকৰাঝাৰ পশ্চিম(জনজাতি) বিধানসভা সমষ্টিৰ য়ুপিপিএলৰ প্ৰাৰ্থী মনোৰঞ্জন ব্ৰহ্ম। ব্ৰহ্মৰ মুঠ সম্পত্তিৰ পৰিমাণ হৈছে ২৬৮ কোটি। ব্ৰহ্ম হৈছে অন্তিম পৰ্যায়ৰো আটাইতকৈ ধনাঢ্য প্ৰাৰ্থী।
উল্লেখ্য যে বিপিএফ তথা প্ৰাক্তন বিটিচি প্ৰধান হাগ্ৰামা মহিলাৰীৰ অতি ঘনিষ্ঠ ঠিকাদাৰ মনোৰঞ্জন ব্ৰহ্মই অলপতে হাগ্ৰামাৰ সংগ এৰি য়ুপিপিএলত যোগদান কৰি দলটোৰ পৰা প্ৰাৰ্থীত্ব লাভ কৰিছে।
বাতৰিৰ মতে মনোৰঞ্জন ব্ৰহ্মৰ বিৰুদ্ধে প্ৰমোদ বড়োৰ নেতৃত্বাধীন বিচিটি প্ৰশাসনে গোচৰ দাখিল কৰাৰ পিছতে ধনাঢ্য ঠিকাদাৰজনে য়ুপিপিএলত যোগদান কৰিছিল।
ব্ৰহ্মৰ পিছতে বৰাকৰ উদৰবন্দ বিধানসভা সমষ্টিৰ নিৰ্দলীয় প্ৰাৰ্থী ৰাহুল ৰয়ে আছে দ্বিতীয় স্থানত। প্ৰাক্তন কংগ্ৰেছী মন্ত্ৰী তথা বৰ্তমানৰ বিজেপি নেতা গৌতম ৰয়ৰ পুত্ৰ ৰাহুল ৰয়ৰ সম্পত্তিৰ পৰিমাণ হৈছে ১৩৬ কোটি। তেওঁ হৈছে দ্বিতীয় পৰ্যায়ৰ আটাইতকৈ ধনাঢ্য প্ৰাৰ্থী।
ইফালে আলগাপুৰ বিধানসভা সমষ্টিৰ পৰা নিৰ্দলীয় প্ৰাৰ্থীৰূপে প্ৰতিদ্বন্দ্বিতা কৰা ৰাহুল ৰয়ৰ পত্নী ডেইজী ৰায়ৰ সম্পত্তিৰ পৰিমাণ হৈছে ১৩১ কোটি।
আনহাতে জমুনামুখ বিধানসভা সমষ্টিৰ প্ৰাৰ্থী চিৰাজুদ্দিন আজমলৰ সম্পত্তিৰ পৰিমাণ হৈছে ১১১ কোটি। চিৰাজুদ্দিন হৈছে এআইয়ুডিএফ প্ৰধান তথা লোকসভাৰ সাংসদ বদৰুদ্দিন আজমলৰ কণিষ্ঠ ভাতৃ।
অগপৰ বিধায়ক তথা নাহৰকটীয়া বিধানসভা সমষ্টিৰ প্ৰাৰ্থী নৰেন সোণোৱালৰ সম্পত্তিৰ পৰিমাণ হৈছে ৩৩ কোটি। এই সোণোৱালেই হৈছে প্ৰথম পৰ্যায়ৰ নিৰ্বাচনৰ লগতে অগপৰ আটাইতকৈ ধনাঢ্য প্ৰাৰ্থী।
বৰ্তমানৰ মন্ত্ৰী ঢকুৱাখানা বিধানসভাৰ বিজেপিৰ প্ৰাৰ্থী নৱ কুমাৰ দলে ২৫ কোটি, জালুকবাৰীৰ বিজেপি প্ৰাৰ্থী মন্ত্ৰী হিমন্ত বিশ্ব শৰ্মা ১৭ কোটি, ছিদলিৰ প্ৰাৰ্থী মন্ত্ৰী চন্দন ব্ৰহ্ম ১৬ কোটি, মন্ত্ৰী সিদ্ধাৰ্থ ভট্টাচাৰ্য ৮ কোটি, পিযুজ হাজৰিকা ৬ কোটি, ৰিহন দৈমাৰী আৰু চুম ৰংহাঙৰ সম্পত্তি পৰিমাণ ৫ কোটি টকা বুলি উল্লেখ কৰা হৈছে শপতনামাত।
বিধানসভাৰ অধ্যক্ষ তথা যোৰহাট বিধানসভা সমষ্টিৰ বিজেপিৰ প্ৰাৰ্থী হিতেন্দ্ৰ নাথ গোস্বামী আৰু উপাধ্যক্ষ আমিনুল হক লস্কৰৰ সম্পত্তিৰৰ পৰিমাণ ৬ কোটি বুলি শপতনামাত উল্লেখ কৰা হৈছে।
আনহাতে মুখ্যমন্ত্ৰী সৰ্বানন্দ সোণোৱাল, মন্ত্ৰী চন্দ্ৰমোহন পাটোৱাৰী, মন্ত্ৰী প্ৰমীলা ৰাণী ব্ৰহ্ম, মন্ত্ৰী অতুল বৰা আৰু মন্ত্ৰী কেশৱ মহন্তৰ আটাইকেইজনৰে গাইপতি সম্পত্তিৰ পৰিমাণ হৈছে ৩ কোটি।
ৰাজ্যিক বিজেপিৰ সভাপতি ৰঞ্জিত কুমাৰ দাস আৰু ৰাজ্যসভাৰ সাংসদ বিশ্বজিৎ দৈমাৰী ৩ কোটি টকাৰ গৰাকী বুলি শপতনামাত উল্লেখ কৰিছে।
শপতনামাৰ মতে মন্ত্ৰী পৰিমল শুল্কবৈদ্য, ভৱেশ কলিতা আৰু যোগেন মোহনৰ গাইপতি সম্পত্তিৰ পৰিমাণ হৈছে ১ কোটি।
আনহাতে বিৰোধী শিবিৰৰ বঢ়মপুৰৰ কংগ্ৰেছ প্ৰাৰ্থী সুৰেশ বৰাৰ ৩৭ কোটি সম্পত্তিৰ গৰাকী। তেওঁ হৈছে কংগ্ৰেছৰ আটাইতকৈ ধনাঢ্য প্ৰাৰ্থী।
ইয়াৰ পিছতে জালুকবাৰীৰ কংগ্ৰেছ প্ৰাৰ্থী ৰমেন চন্দ্ৰ বৰঠাকুৰৰ সম্পত্তি ৩১ কোটি, প্ৰাক্তন মন্ত্ৰী ছিদ্দিক আহমেদ ২৬ কোটি, ভৰত চন্দ্ৰ নৰহ ২১ কোটি আৰু ৱাজেড আলী চৌধুৰীৰ সম্পত্তিৰ পৰিমাণ হৈছে ১১ কোটি।
উল্লেখ্য যে মহিলা প্ৰাৰ্থী ডেইজী ৰয়ৰ পিছতে ৰাইজৰ দলৰ জমুনামুখৰ মহিলা প্ৰাৰ্থী দিলৱাৰা বেগম চৌধুৰীৰ সম্পত্তিৰ পৰিমাণ হৈছে ১৫ কোটি। এআইয়ুডিএফৰ মিলাক্ষী ৰহমান ১০ কোটি, কংগ্ৰেছৰ অসীমা বৰদলৈ ৭ কোটি আৰু কণ্ঠশিল্পী অগপৰ কল্পনা পাটোৱাৰীৰ সম্পত্তি পৰিমাণ হৈছে ৫ কোটি।
নতুনকৈ গঠিত আঞ্চলিক দল অসম জাতীয় পৰিষদৰ হাজোৰ প্ৰাৰ্থীৰ দুলু আহমেদ হৈছে দলটোৰ ভিতৰত ধনাঢ্য প্ৰাৰ্থী। তেওঁৰ সম্পত্তিৰ পৰিমাণ হৈছে ৪৩ কোটি। দলটোৰ বঙাইগাঁৱৰ প্ৰাৰ্থী দীপু চৌধুৰীৰ সম্পত্তিৰ পৰিমাণ হৈছে ১২ কোটি।
ইফালে এচ’ছিয়েশ্যন ফ’ৰ ডেম’ক্ৰেটিক ৰিফ’ৰ্মছ(ADR)ৰ বিশ্লেষণ অনুসৰি অসম বিধানসভা ২০২১ৰ নিৰ্বাচনত কংগ্ৰেছ দলৰ সৰ্বাধিক কোটিপতি প্ৰাৰ্থীয়ে প্ৰতিদ্বন্দ্বিতা কৰিছে। কংগ্ৰেছৰ ৬৪ গৰাকী কোটিপতি প্ৰাৰ্থীৰ বিপৰীতে বিজেপিয়ে ৬০ গৰাকী কোটিপতি প্ৰাৰ্থীৰেৰে তালিকাৰ দ্বিতীয় স্থানত আছে।
আনহাতে নতুন আঞ্চলিক দল অসম জাতীয় পৰিষদৰ ১৩ গৰাকী প্ৰাৰ্থীৰেৰে তৃতীয়, ২২ গৰাকী কোটিপতি প্ৰাৰ্থীৰেৰে অসম গণ পৰিষদে চুতুৰ্থ, ১১ গৰাকী কোটিপতি প্ৰাৰ্থীৰেৰে এআইয়ুডিএফে পঞ্চম, ৮ গৰাকী কোটিপতি প্ৰাৰ্থীৰেৰে বিপিএফে ষষ্ঠ, য়ুপিপিএল আৰু ৰাইজৰ দলৰ এগৰাকীকৈ কোটিপতি প্ৰাৰ্থীৰেৰে তালিকাৰ অন্তিম স্থানত আছে।
ইফালে এই নিৰ্বাচনত আটাইতকৈ সম্পদহীন তিনিগৰাকী প্ৰাৰ্থী হৈছে ক্ৰমে সবেন্দ্ৰ বসুমতাৰী, তেওঁৰ সম্পত্তি পৰিমাণ মাত্ৰ ২,৫০০। ৫,০০০ সম্পত্তিৰ গৰাকী কনক বসুমতাৰী আৰু ৮,০০০ সম্পত্তিৰে বিষ্ণু ধাৰী মল্লাহ দ্বিতীয় আৰু তৃতীয় স্থানত আছে।
