গুজৰাটৰ পৰা ২,৮০০ কিলোমিটাৰ খোজকাঢ়ি আহি অসমত উপস্থিত হ’ল এজন লোক
ক’ৰ’নাতংকৰ বাবে সমগ্ৰ দেশত অব্যাহত আছে ল’কডাউন।
এই ল’কডাউনৰ সময়তে এজন অসমীয়া লোকে সুদূৰ গুজৰাটৰ পৰা খোজেৰে ২,৮০০ কিলোমিটাৰ পথ অতিক্ৰম কৰি অসমত উপস্থিত হৈছেহি।
অবিশ্বাস্য যেন লাগিলেও এয়া সত্য।
নগাঁৱৰ যাদৱ গগৈ নামৰ লোকজনে এই অসম্ভৱক সম্ভৱ কৰি তুলিছে।
৪৫ বৰ্ষীয় যাদৱ গগৈয়ে জেপত ৪,০০০ টকা লৈ ২৫ দিন খোজকাঢ়ি আহি নগাঁও জিলাৰ ৰহাত উপস্থিত হয়হি।
কেন্দ্ৰীয় শাসিত অঞ্চল দমনৰ বাপী চহৰত প্ৰব্ৰজিত শ্ৰমিকৰূপে কৰ্মৰত লোকজনে যোৱা ২৭ মাৰ্চত এই গৃহাভিমূখী যাত্ৰা আৰম্ভ কৰিছিল।
যাত্ৰাকালত লোকজনে বিহাৰত প্ৰৱেশ কৰাৰ পিছতে প্ৰচণ্ড ভৰিৰ বিষত আক্ৰান্ত হৈছিল।
যোৱা দেওবাৰে লোকজনক ৰহাৰ টুলগেটৰ পৰা নগাঁও জিলা অসম জাতীয়তাবাদী পৰিষদে উদ্ধাৰ কৰে।
স্থানীয় জিলা যুৱ ছাত্ৰ পৰিষদৰ নেতা দিব্যজ্যোতি হাজৰিকাৰ মতে যাদৱ গগৈক উদ্ধাৰ কৰি ৰহাৰ আৰক্ষী থানালৈ নি পিছত ভোগেশ্বী ফুকননী চিকিৎসালয়ত ভৰ্তি কৰায়।
চিকিৎসকৰ মতে লোকজন বৰ্তমান সুস্থ যদিও শাৰীৰিকভাৱে যথেষ্ট অৱসাদগ্ৰস্ত হৈ আছে।
লোকজনক কোভিড১৯ৰ স্বাস্থ্য পৰীক্ষা কৰি ১৪ দিনৰ বাবে কোৱাৰান্টেইন কৰা হৈছে বুলি জানিবলৈ দিছে চিকিৎসকে।
যাদৱ গগৈৰ ঘৰ নগাঁও জিলাৰ ৰহাৰ গধৰীয়াত বুলি জানিব পৰ গৈছে।