কলিযাবৰৰ হাতীমুৰাত হাতী-মানুহৰ বন্ধুত্বপূৰ্ণ সম্পৰ্ক

ৰাজ্যৰ বিভিন্ন প্ৰান্তত হাতী-মানুহৰ সংঘাত অব্যাহত থকাৰ সময়তে পোহৰলৈ আহিছে আন এক বিপৰীত ঘটনা। জানিব পৰা মতে এটা বনৰীয়া হাতীয়ে বিগত ৬ মাহ ধৰি কলিয়াবৰৰ হাতীমুৰাত অৱস্থিত মহিষমৰ্দ্দিনী দুৰ্গা মন্দিৰৰ সমীপত অৱস্থান কৰি আহিছে। কিন্তু এই বনৰীয়া হাতীটোৱে বৰ্তমানলৈকে মানুহৰ কোনো ক্ষয়-ক্ষতি কৰা নাই বুলি অঞ্চলটোৰ ৰাইজে জানিবলৈ দিয়ে। আনহাতে এই হাতীটোক অঞ্চলটোৰ ৰাইজে প্ৰতিদিনে খাদ্যৰো যোগান ধৰি আহিছে। স্থানীয় ৰাইজে জনোৱা মতে হাতীটোক একেবাৰে ওচৰৰ পৰা খাদ্য যোগান ধৰি আহিছে যদিও হাতীটোৱে এতিয়ালৈকে কাৰো একো অপকাৰ কৰা নাই।

অবশ্যে বনবিভাগৰ লোকে মাজে-সময়ে আহি হাতীটোক চোৱা-চিতা কৰাৰ লগতে খাদ্যৰো যোগান ধৰে বুলি জানিব পৰা গৈছে। ইফালে হাতীটোৱে ভৰিত সামান্য আঘাত পাইছিল যদিও বৰ্তমান সুস্থ বুলি বনবিভাগৰ এটা সুত্ৰই কয়। মন কৰিবলগীয়া যে প্ৰায় ২ ফুট দীঘল দাঁতৰ অধিকাৰী এই দঁতাল হাতীটোৰ ওচৰে-পাঁজৰে গৰু-ছাগলী চৰি ফুৰে যদিও হাতীটোৱে সিহঁতৰো একো ক্ষতি সাধন কৰা নাই।

ৰাজ্যৰ কোনো প্ৰান্তত বনৰীয়া হাতীয়ে ঘৰ-দুৱাৰ ভাঙি তথা খেতি-বাতি তহিলং কৰাৰ পৰিপ্ৰেক্ষিতত হাতী-মানুহৰ এনে বন্ধুত্বপূৰ্ণ সম্পৰ্কৰ দৃশ্যই সকলোকে আচৰিত কৰাৰ লগতে আনন্দও দিছে।