সমগ্ৰ উজনি অসমতে ক্ৰমাৎ জলসিঞ্চন বিভাগ বগা হাতীত পৰিণত হোৱা দেখা গৈছে।
যোৰহাট জিলাত ৩৮ খন গভীৰ নলীনাদ জলসিঞ্চন আঁচনি আছে যদিও ইয়াৰে অধিকাংশ আঁচনিয়ে বিকল হৈ আছে।
যি দুই এখন যেনে তেনে চলি আছে সেই আঁচনিৰো সকলো বিলাক অংশই পানী যোগান দি নোৱাৰে।
জানিবপৰা মতে এই আঁচনি সমূহত ২৩৪ জন কৰ্মচাৰী নিয়োগ হৈ আছে যদিও ইয়াৰ সুফল লাভ কৰা নাই কৃষকে।
এই ২৩৪ জন কৰ্মচাৰীৰ বিপৰীতে ৰাজকোষৰ পৰা প্ৰতি মাহে শকত অংশৰ ধন ব্যয় কৰি আহিছে চৰকাৰে। এইয়া মাথোঁ এক উদাহৰণহে।
এনে এখন আঁচনি ১৯৮৬ চনতে টীয়কৰ বনাই অঞ্চলৰ কৃষকৰ সুবিধাৰ্থে স্থাপন কৰা হৈছিল যদিও আজিও কাৰ্যক্ষম হৈ নুঠিল।
এতিয়াও কৃষকে বতৰৰ ওপৰত নিৰ্ভৰ কৰিয়েই খেতি খোলা আৰম্ভ কৰিবলগীয়া হৈছে।
ফলস্বৰূপে সময়মতে বীজ সিচিব নোৱাৰাৰ ফলত পৰিশ্ৰমলৈ চাই ফচলৰ উপযুক্ত আমদানি হোৱা নাই কৃষকসকলৰ।
সেয়ে কৃষক সমাজে এইবাৰ নতুন চৰকাৰখনক বিকল্প ব্যৱস্থাৰে হ’লেও পথাৰত পানী যোগান ধৰি কৃষকসকলক উপকৃত কৰিব বুলি আশা প্ৰকাশ কৰিছে।
