শেহতীয়াকৈ উচ্চতম ন্যায়ালয়ে এক সিদ্ধান্তত মহাৰাষ্ট্ৰৰ নল্লাসপাৰাৰ আচোলেত অৱস্থিত জয় আম্বে ৱেলফেয়াৰ ছ’চাইটিৰ ৪১টা অট্টালিকা ভাঙি পেলোৱাৰ নিৰ্দেশ দিছে। জানিব পৰা মতে, এই ৪১ টা অট্টালিকাত ৮ হাজাৰৰো অধিক নিম্ন মধ্যবিত্তীয় পৰিয়ালে বাস কৰে।
উল্লেখ্য যে ২০০৬ চনতে নিৰ্মাণ কৰা হৈছিল এই অট্টালিকাসমূহ। তেতিয়াৰে পৰা এই পৰিয়াল সমূহে তাতে বসবাস কৰি আহিছে।
উচ্চতম ন্যায়ালয়ৰ ৰায়দানত কোৱা হৈছে যে এই অট্টালিকাসমূহ অবৈধভাৱে নিৰ্মাণ কৰা হৈছিল।
কিন্তু প্ৰশ্ন উত্থাপন হয়, যদি এই নিৰ্মাণ অবৈধ আছিল তেন্তে প্ৰশাসনৰ অনুমতিৰ অবিহনে ৩০ একৰ মাটিত ৪১ টা অট্টালিকা নিৰ্মাণ কৰাতো কেনেদৰে সম্ভৱ হৈছিল? এই অবৈধ নিৰ্মাণত পৌৰসভাৰ কৰ্তৃপক্ষ, বিল্ডাৰ, আমোলা, স্থানীয় ৰাজনীতিবিদসকল জড়িত আছিল নেকি? যদি তেওঁলোক এই অবৈধ নিৰ্মাণত জড়িত আছিল তেন্তে দুখীয়া পৰিয়ালবোৰে আনৰ দুৰ্নীতিৰ পৰিণাম কিয় ভোগ কৰিব?
মূলতঃ এই মাটিখিনি নলা-নৰ্দমা আৰু ডাম্পিং গ্ৰাউণ্ডৰ বাবে নিৰ্ধাৰণ কৰা হৈছিল। কেনেবাকৈ এই মাটিত অট্টালিকা নিৰ্মাণৰ অনুমতি দিয়া হ’ল আৰু এপাৰ্টমেণ্টবোৰ এই নিম্ন মধ্যবিত্তীয় পৰিয়ালবোৰক কৌশলেৰে বিক্ৰী কৰা হ’ল। তাৰ বাবে দায়ী কোন?
এতিয়া প্ৰশ্ন হৈছে, অট্টালিকাবোৰ অবৈধ হ’লেও বৈধ সম্পত্তি কিনা বুলি ভবা এই নিৰীহ পৰিয়ালবোৰে কিয় ক্ষতিগ্ৰস্ত হ’ব লাগিব? এই অন্যায়ৰ মোকাবিলা কৰিবলৈ ৰাজ্য বা ৰাষ্ট্ৰীয় নীতি কিয় নাই? বিশেষকৈ সদায় দুখীয়া আৰু মধ্যবিত্ত মানুহেই “প্ৰগতি”ৰ স্বাৰ্থত নিজৰ মাটি ভেটি হেৰুৱাবলগীয়া কিয় হয়? এইবোৰ প্ৰশ্নই এতিয়া চৰ্চা লাভ কৰিছে।
