পাকিস্তানী এজেণ্টক মোবাইল চিম কাৰ্ড যোগান ধৰাৰ অভিযোগত অসম আৰক্ষীয়ে নগাঁও আৰু মৰিগাঁও জিলাৰ ৫ গৰাকী লোকক গ্ৰেপ্তাৰ কৰিছে। ধৃত ব্যক্তিকেইগৰাকীৰ পৰা বিদেশী দূতাবাসৰ সৈতে প্ৰতিৰক্ষা তথ্য ভাগ-বতৰা কৰিবলৈ ব্যৱহাৰ কৰা হেণ্ডছেটকে ধৰি কেইবাটাও মোবাইল ফোন, চিম কাৰ্ড আৰু অন্যান্য সামগ্ৰী জব্দ কৰা হৈছে বুলি আৰক্ষীয়ে জানিবলৈ দিছে।
অসম আৰক্ষীৰ মুখপাত্ৰ প্ৰশান্ত ভূঞাই এই সন্দৰ্ভত উল্লেখ কৰা মতে, চোৰাংচোৱা ব্যুৰো আৰু অন্যান্য সূত্ৰৰ পৰা পোৱা তথ্যৰ ভিত্তিত মঙলবাৰে নিশা চলোৱা অভিযানৰ সময়ত আৰক্ষীয়ে ব্যক্তিকেইগৰাকীক গ্ৰেপ্তাৰ কৰে।
তেওঁ লগতে জানিবলৈ দিয়া মতে এই জিলা দুখনৰ পৰা প্ৰায় ১০ গৰাকী লোকে কেইবাটাও টেলিকম সেৱা কোম্পানীৰ পৰা প্ৰৱঞ্চনামূলকভাৱে চিম কাৰ্ড ক্ৰয় কৰি কিছুমান পাকিস্তানী এজেণ্টক যোগান ধৰা কাৰ্যত জড়িত হৈ থকাৰ তথ্য পোৱা গৈছিল।
দেশৰ অখণ্ডতা আৰু সাৰ্বভৌমত্বৰ বিৰুদ্ধে কাম কৰা এই অভিযুক্তসকলৰে পাঁচগৰাকীক মঙলবাৰে নিশা গ্ৰেপ্তাৰ কৰা হয় বুলি তেওঁ লগতে কয়। ধৃত ব্যক্তিকেইগৰাকীক নগাঁৱৰ আছিকুল ইছলাম, বদৰ উদ্দিন, মিজানুৰ ৰহমান, ৱাহিদুজ জামান আৰু মৰিগাঁৱৰ বাহাৰুল ইছলাম বুলি চিনাক্ত কৰা হৈছে।
ধৃত ব্যক্তিকেইগৰাকীৰ লগতে পলাতক আন পাঁচগৰাকী অভিযুক্তৰ ঘৰৰ পৰা ১৮ টা মোবাইল ফোন, প্ৰৱঞ্চনামূলক উদ্দেশ্যত ক্ৰয় কৰা বুলি সন্দেহ কৰা ১৩৬ টা চিম কাৰ্ড, এটা ফিংগাৰপ্ৰিণ্ট স্কেনাৰ, এটা হাই-টেক চিপিইউ আৰু আন কিছু নথি-পত্ৰ জব্দ কৰা হৈছে বুলি বিষয়াগৰাকীয়ে কয়।
জেৰাৰ সময়ত আছিকুল ইছলামে দুটা আইএমইআই নম্বৰ থকা এটা মোবাইল হেণ্ডছেট ব্যৱহাৰ কৰাৰ তথ্য পোহৰলৈ অহা বুলি আৰক্ষীয়ে উল্লেখ কৰিছে। এই হেণ্ডছেটৰ পৰা হোৱাটছএপ কল যোগে প্ৰতিৰক্ষা তথ্য বিদেশী দূতাবাসৰ সৈতে ভাগ-বতৰা কৰিছিল বুলি আৰক্ষীয়ে লগতে দাবী কৰিছে।
