ৰাজ্যখনৰ উৎকৃষ্ট খেলুৱৈৰ বাবে চৰকাৰী চাকৰিত মিজোৰাম চৰকাৰে ৫শতাংশ সংৰক্ষণৰ কথা বৃহস্পতিবাৰে ঘোষণা কৰিছে।
ক্ৰীড়াক উৎকৃষ্ট ৰূপত তুলি ধৰা তথা ক্ৰীড়াক এক আকৰ্ষণীয় কেৰিয়াৰ হিচাপে গঢ়ি তোলাৰ বাবেই ৰাজ্য চৰকাৰখনে এই সিদ্ধান্ত গ্ৰহণ কৰিছে।
ৰাজ্যখনৰ পাৰ্ছনেল তথা প্ৰশাসনীয় সংস্কাৰ বিভাগৰ দ্বাৰা জাৰি কৰা এখন আনুষ্ঠানিক পত্ৰত কোৱা হৈছে: ‘’আন্তৰ্জাতিক পৰ্যায়ত দেশক প্ৰতিনিধিত্ব কৰা, ৰাষ্ট্ৰীয় পৰ্যায়ৰ প্ৰতিযোগিতাত ৰাজ্যখনক প্ৰতিনিধিত্ব কৰা, কেন্দ্ৰীয় যুৱ আৰু ক্ৰীড়া পৰিক্ৰমাৰ স্বীকৃত আন্ত:বিশ্ববিদ্যালয় প্ৰতিযোগিতা আৰু ৰাষ্ট্ৰীয় ক্ৰীড়াত ৰাজ্যখনৰ বিদ্যালয়ৰ টীমক প্ৰতিনিধিত্ব কৰা উৎকৃষ্ট খেলুৱৈৰ বাবে গ্ৰুপ বি, চি আৰু ডি’ৰ খালী পদৰ ৫ শতাংশ সংৰক্ষণ কৰা হ’ব।‘’
পোনপটীয়াকৈ নিযুক্তি দিবলগীয়া এই নিযুক্তিৰ ক্ষেত্ৰত যিসকলে জিলাখনক প্ৰতিনিধিত্ব কৰি ৰাজ্যিক পৰ্যায়ৰ ক্ৰীড়াত স্বৰ্ণ পদক লাভ কৰে তেনে উৎকৃষ্ট খেলুৱৈৰ বাবেও সংৰক্ষণ থাকিব বুলি পত্ৰখনত কোৱা হৈছে।
ফুটবল,বক্সিং আৰু ক্ৰিকেটকে ধৰি ২৮ বিধ ক্ৰীড়াত যোগ্যতাৰ মাপকাঠী পূৰণ কৰা আবেদনকাৰীক পোনপটীয়া নিযুক্তি দিয়া হ’ব।
নিযুক্তিৰ বাবে বয়সৰ উৰ্দ্ধসীমা ৫বছৰলৈ (অনুসূচীত জাতি আৰু অনুসূচীত জনজাতিৰ বাবে ১০ বছৰ) ৰেহাই দিয়া হ’ব।
আন্তৰ্জাতিক পৰ্যায়ত দেশক প্ৰতিনিধিত্ব কৰা খেলুৱৈসকলক প্ৰথম অগ্ৰাধিকাৰ দিয়া হ’ব।
খেলুৱৈৰ বাবে সংৰক্ষিত পদত পোনপটীয়া নিযুক্তিৰ বাবে খেলুৱৈৰ যোগ্যতা নিৰ্দ্ধাৰণকাৰী প্ৰমান পত্ৰ প্ৰদানৰ দায়িত্ব ক্ৰীড়া আৰু যুৱ সঞ্চালকালয়ক অৰ্পন কৰা হৈছে।
