শুকুৰবাৰে নিশা ডিব্ৰুগড়ৰ নিজ কদমণিত সংঘটিত হৈছে এক ভয়ংকৰ অগ্নিকাণ্ডৰ ঘটনা। অগ্নিকাণ্ডটোত অগ্নিদগ্ধ হৈ কৰুণভাৱে মৃত্যুক সাৱটি লৈছে ৫জন লোকে।
অগ্নিকাণ্ডটোত মৃত্যু হোৱা লোককেইজনৰ মাজত আছে একেটা পৰিয়ালৰ ৪জনকৈ লোক।
নিশা শুই থকা অৱস্থাতে ঘৰটোত অগ্নিকাণ্ডৰ ঘটনা সংঘটিত হয়। ভয়মকৰ অগ্নিকাণ্ডটোৰ ফলত অগ্নিদগ্ধ হৈ দুটি শিশু, এগৰাকী মহিলাসহ ৫ জন লোকৰ থিতাতে মৃত্যু হয়।
মায়া দেৱী নামৰ মহিলাগৰাকীৰ ৩টা বাসগৃহ এই অগ্নকাণ্ডৰ ফলত জুইত ভস্মীভূত হয়। নিশা প্ৰায় ডেৰ বজাত অগ্নিকাণ্ডটো সংঘটিত হোৱা বুলি জানিব পৰা গৈছে।
চিলিণ্ডাৰ বিস্ফোৰণৰ ফলতে ভয়ংকৰ অগ্নিকাণ্ডটো সংঘটিত হোৱা বুলি নিশ্চিত কৰা হৈছে।
অগ্নিকাণ্ডটো সংঘটিত হোৱাৰ সময়ত পৰিয়ালটোৰ সকলো শুই থকাৰ বাবে জীৱন্তে অগ্নিদগ্ধ হৈ মৃত্যু মুখত পৰে লোককেইজন।
অগ্নিকাণ্ডটোৰ ফলত মাতৃ মায়া দেৱী, পুত্ৰ বিশাল সোণাৰ, দুগৰাকী নাতি ক্ৰমে শিবু সোণাৰ আৰু শংকু সোণাৰৰ লগতে তেওঁলোকৰ ঘৰৰ কাম কৰা নুনু নামৰ লোকজনৰ কৰুণভাৱে মৃত্যু হয়।
ডিব্ৰুগড়ৰ নিজ কদমনিৰ এই ভয়ংকৰ অগ্নিকাণ্ডটোত ৫জনকৈ লোকে কৰুণভাৱে মৃত্যুক সাৱটি লোৱা ঘটনাত গভীৰ শোক প্ৰকাশ কৰিছে মুখ্য মন্ত্ৰী সৰ্বানন্দ সোণোৱালে।
মুখ্য মন্ত্ৰীয়ে উপায়ুক্তক ঘটনাৰ তদন্তৰ নিৰ্দেশ দিয়াৰ লগতে মৃত্যু হোৱা প্ৰতিগৰাকী লোকৰ বাবদ ৪ লাখ টকাকৈ এককালীন সাহায্য প্ৰদান কৰাৰো নিৰ্দেশ দিয়ে।
