যোৰহাট জিলা প্ৰশাসনে কৰ’নাৰ সংক্ৰমণ ৰোধৰ বাবে বৃহস্পতিবাৰৰ পৰা আৰম্ভ হোৱা অনিৰ্দিষ্টকালীন লকডাউনৰ সময়ছোৱাত জনসাধাৰণক প্ৰশাসনৰ সৈতে সহযোগিতা কৰাৰ আহ্বান জনাইছে।
ইয়াৰ পূৰ্বে প্ৰশাসনে যোৱা ৯জুলাইৰ পৰা ১৫জুলাইলৈকে যোৰহাট পৌৰসভা এলেকাত সম্পূৰ্ণ লকডাউন ঘোষণা কৰিছিল।
কিন্তু পজিটিভ ৰোগীৰ সংখ্যা বৃদ্ধি পোৱালৈ চাই পৌৰসভাৰ অধীনৰ এলেকাৰ উপৰিও ১১টা মফচলীয়া অঞ্চলত লকডাউন বৃদ্ধি কৰাৰ সিদ্ধান্ত লয়।
প্ৰশাসনে কেইবাটাও কাৰণত লকডাউন বৃদ্ধি কৰিছে যদিও ক্ষিপ্ৰ গণ সংক্ৰমণেই হৈছে প্ৰধান কাৰণ।
উপায়ুক্ত ৰোশ্নি এ কোৰাটিয়ে প্ৰকাশ কৰে যে ১জুলাইৰ পৰা ৯জুলাইলৈকে ভ্ৰমণ বৃত্তান্ত নথকা ৬৩ জন ৰোগী আছিল যদিও বৃহস্পতিবাৰে এই সংখ্যা ২৮৬জনলৈ বৃদ্ধি পায়।
বিগত ১১দিনৰ ভিতৰত মুঠ আক্ৰান্ত ৰোগীৰ সংখ্যা দুগুণতকৈয়ো অধিক বৃদ্ধি পাইছে।
যোৰহাটত মুঠ আক্ৰান্ত ৬০৫জনৰ ভিতৰত ২৫০জনক আৰোগ্য লাভৰ পাছত মুক্ত কৰা হৈছে আৰু সক্ৰিয় ৰোগীৰ সংখ্যা হৈছে ৩৪৯জন।
বৃহস্পতিবাৰে মুঠ ৯২জন আক্ৰান্তৰ ভিতৰত ৭৭জনৰেই নাছিল কোনো ভ্ৰমণ বৃত্তান্ত।
কোৰাটিয়ে লগতে জানিবলৈ দিয়ে যে বিগত দুটা সপ্তাহত ৫৪গৰাকী স্বাস্থ্যকৰ্মী আৰু ১৮গৰাকী আৰক্ষীৰ লোক আক্ৰান্ত হৈছে। আনহাতে, দুগৰাকী লোকৰ মৃত্যু হৈছে।
কোভিড-১৯ৰ সংক্ৰমণৰ বাবে বৃহস্পতিবাৰে তিতাবৰৰ প্ৰথম ৰেফাৰেল য়ুনিটৰ অ’পিডি বন্ধ কৰি দিয়া হৈছে আৰু ইয়াৰ কৰ্মৰত সকলোৰে নমুনা সংগ্ৰহ কৰা হৈছে।
উপায়ুক্তগৰাকীয়ে কয় যে এই লকডাউনত গেলামাল, সাহায্য, শাক-পাচলি আৰু ঔষধ-পাতিকে ধৰি অত্যাৱশ্যকীয় যোগান সেৱা মুকলি থাকিব।
তেওঁ সোনকালে যাতে স্বাভাৱিক জীৱন যাত্ৰা ঘুৰি আহিব পাৰে তাৰ বাবে জনসাধাৰণক লকডাউন মানি চলিবলৈ আহ্বান জনায়।
