তামিলনাডুত সংঘটিত হৈছে এক শোকাৱহ দুৰ্ঘটনা। এখন ট্ৰাকৰ সৈতে এখন ব্যক্তিগত বাহনৰ মুখামুখি সংঘৰ্ষৰ ফলত প্ৰাণ হেৰুৱাইছে ছয়গৰাকী লোকে।
আজি পুৱতি নিশা সংঘটিত হয় এই দুৰ্ঘটনা। দুৰ্ঘটনাত নিহত লোকসকল অৱসৰ বিনোদনৰ বাবে তামিলনাডুৰে কুত্ৰলাম ভ্ৰমণ কৰিছিল। উভতনি যাত্ৰাতে দুৰ্ঘটনাত পতিত হয় তেওঁলোকৰ বাহনখন।
প্ৰকাশিত খবৰ অনুসৰি, পুৱা প্ৰায় ৩:৩০ বজাত বাহনখনৰ চালকজন অসাৱধানতাৱশতঃ টোপনি যায় আৰু ইয়াৰ ফলত বাহনখনে কেৰালা অভিমুখী ট্ৰাকখনত মুখামুখিকৈ খুন্দা মাৰে।
এই দুৰ্ঘটনাত বাহনখনত থকা ছয়জন লোকৰ ভিতৰত ৫জনৰ থিতাতে মৃত্যু হয়। আনহাতে আঘাতপ্ৰাপ্ত আনজন লোকক চিকিৎসালয়লৈ নিয়াৰ সময়তে পথতে মৃত্যু হয়।
ঘটনাৰ খবৰ লাভ কৰাৰ পিছতে স্থানীয় আৰক্ষী আৰু অগ্নিনিৰ্বাপক বাহিনীৰ দল ঘটনাস্থলীত উপস্থিত হৈ প্ৰায় সম্পূৰ্ণৰূপে ধ্বংস হোৱা বাহনখনৰ পৰা মৃতদেহকেইটা উদ্ধাৰ কৰে।
ইয়াৰ পিছতে মৃতদেহ কেইটা মৰণোত্তৰ পৰীক্ষাৰ বাবে তিৰুনেলভেলী চৰকাৰী চিকিৎসালয়লৈ স্থানান্তৰ কৰা হয়। আৰক্ষীয়ে এই ঘটনাৰ তদন্ত ইতিমধ্যে আৰম্ভ কৰিছে।
