যোৱা ২৪ ঘন্টাত মণিপুৰত দুটা নিষিদ্ধ গোটৰ মুঠ ৭ জন সদস্যক আৰক্ষী আৰু নিৰাপত্তা বাহিনীয়ে গ্ৰেপ্তাৰ কৰিছে। সোমবাৰে আৰক্ষী সূত্ৰৰ পৰা জানিব পৰা মতে, গ্ৰেপ্তাৰ হোৱা লোকসকলৰ ভিতৰত ৬ জন দুটা সশস্ত্ৰ নিষিদ্ধ গোটৰ সদস্য। সপ্তমজন মেইটেই সশস্ত্ৰ সংগঠন আৰম্বাই টেংগোলৰ সদস্য।
থৌবাল আৰু বিষ্ণুপুৰ জিলাৰ পৰা দুটা পৃথক অভিযানত গ্ৰেপ্তাৰ কৰে ৭ জন লোকক। আৰক্ষীৰ সূত্ৰ অনুসৰি তেওঁলোকৰ বিৰুদ্ধে অপহৰণ আৰু ধন দাবীকে ধৰি বিভিন্ন অভিযোগ উত্থাপন হৈছে। ইয়াৰ উপৰি সোমবাৰে মণিপুৰৰ বিভিন্ন জিলাৰ পৰা নিৰাপত্তাৰক্ষীয়ে উদ্ধাৰ কৰে কেইবাটাও স্নাইপাৰ ৰাইফল, দুটা বল্ট একচন ৰাইফল, এটা ৯ এম এম পিষ্টল, কেইবাটাও গ্ৰেনেডকে ধৰি কেইবাটাও আগ্নেয়াস্ত্ৰ আৰু গুলী।
ইম্ফল আৰক্ষীৰ এগৰাকী বিষয়াই জনোৱা মতে, থৌবালৰ চৰাংপট মায়াই লেইকাইৰ পৰা কাংগলেইপাক কমিউনিষ্ট পাৰ্টি (পিপলছ ৱাৰ গ্ৰুপ)ৰ পাঁচজন সদস্যক গ্ৰেপ্তাৰ কৰা হৈছে। আগ্নেয়াস্ত্ৰৰ উপৰিও পাঁচটা মোবাইল ফোন, ১৩টা চিমকাৰ্ড আৰু এখন চাৰিচকীয়া বাহন জব্দ কৰে আৰক্ষীয়ে। সেইদিনা বিষ্ণুপুৰ জিলাৰ কুম্বিৰ পৰা PREPAK নামৰ আন এটা নিষিদ্ধ সংগঠনৰ আৰু এজন সদস্যক গ্ৰেপ্তাৰ কৰা হয়।
প্ৰসংগক্ৰমে মণিপুৰৰ মেইটেই আৰু কুকি জনগোষ্ঠীৰ সংঘাতৰ পৰিস্থিতি শেহতীয়াকৈ পুনৰ উত্তপ্ত হৈ পৰিছে। যোৱা ছেপ্টেম্বৰৰ পৰা মণিপুৰৰ বৃহৎ অঞ্চলত সংঘৰ্ষ চলি আছে। আৰক্ষী আৰু অৰ্ধসামৰিক বাহিনীৰ যৌথ দলে বিভিন্ন অঞ্চলত বহু গুলী আৰু আগ্নেয়াস্ত্ৰ জব্দ কৰে। ইফালে, যোৱা মাহৰ আৰম্ভণিতে মণিপুৰত আৰু ছমাহৰ বাবে বৃদ্ধি কৰা হৈছে সশস্ত্ৰ বাহিনীৰ বিশেষ ক্ষমতা আইন। ইম্ফল, বিষ্ণুপুৰ, জিৰিবাম, লামফেলকে ধৰি ১৯টা থানা এলেকাৰ বাহিৰে সমগ্ৰ ৰাজ্যত এই আইনখন বৃদ্ধি কৰা হৈছে। অৱশ্যে মণিপুৰৰ উত্তপ্ত পৰিস্থিতিৰ সৈতে ৰাজনৈতিক হেঁচা এতিয়াও অব্যাহত আছে।
