গুজৰাটৰ মোৰবিৰ ট্ৰেজিক কাণ্ডই দেশজুৰি এক শোকাকুল পৰিবেশৰ সৃষ্টি কৰাৰ সময়তে এইবাৰ মহাৰাষ্ট্ৰত সংঘটিত হৈছে আন এক শোকাৱহ দুৰ্ঘটনা।
ৰাজ্যখনৰ চ’লাপুৰ জিলাত সোমবাৰে এক শোভাযাত্ৰাৰ সময়ত এখন দ্ৰুতবেগী গাড়ীয়ে খুন্দা মৰাৰ ফলত সাতগৰাকী তীৰ্থযাত্ৰীৰ মৃত্যু হয়।
আৰক্ষীয়ে জানিবলৈ দিয়া মতে, জিলাখনৰ চাংগোলা চহৰ অঞ্চলৰ ওচৰত সন্ধিয়া প্ৰায় ৬:৪৫ বজাত এই ঘটনা সংঘটিত হয়।
প্ৰকাশিত খবৰ অনুসৰি ৩২ জনীয়া তীৰ্থযাত্ৰীৰ দলটো মন্দিৰচহৰ পান্ধৰপুৰলৈ বহুদিনীয়া কাৰ্যসূচীৰে ধৰ্মীয় ৰীতি-নীতি অনুসৰি খোজকাঢ়ি আহিছিল।
দলটোৱে কোলহাপুৰ জিলাৰ জাথাৰৱাড়ী নামৰ অঞ্চলৰ পৰা যাত্ৰা আৰম্ভ কৰিছিল বুলি আৰক্ষীয়ে জানিবলৈ দিছে।
আৰক্ষীৰ ভাষ্য মতে সোমবাৰে সন্ধিয়া নিয়ন্ত্ৰণহীন দ্ৰুতবেগী গাড়ীখনে তীৰ্থযাত্ৰীৰ দলটোক মহতিয়াই নিয়ে আৰু ইয়াৰ ফলত এই ধৰ্মীয় যাত্ৰা এক ট্ৰেজিক ঘটনাত পৰিণত হয়।
এই ভয়াৱহ দুৰ্ঘটনাত দলটোৰ সাতগৰাকী লোকে প্ৰাণ হেৰুওৱাৰ বিপৰীতে কেইবাগৰাকীও লোকে আঘাত পায়।
ঘটনাৰ পাছতে স্থানীয় আৰক্ষী ঘটনাস্থলীত উপস্থিত হয় আৰু আহতসকলক চিকিৎসালয়লৈ প্ৰেৰণ কৰে।
আনহাতে এই দুৰ্ঘটনাৰ সন্দৰ্ভত ইতিমধ্যে তদন্ত আৰম্ভ কৰা হৈছে বুলি আৰক্ষীৰ এগৰাকী বিষয়াই জানিবলৈ দিয়ে।
