কৰ’না ভাইৰাছৰ সংক্ৰমণৰ ফলত ভাৰতত মৃত্যু হোৱা লোকৰ ভিতৰত জ্যেষ্ঠ নাগৰিকৰ সংখ্যাই অধিক।স্বাস্থ্য মন্ত্ৰ্যালয়ৰ তথ্য অনুসৰি, বৰ্তমানলৈ মৃত্যু হোৱা লোকৰ ভিতৰত ৭৫বয়সৰ উৰ্দ্ধৰ ব্যক্তিৰ হাৰ ৪২.২ শতাংশ।
তদুপৰি, ০-৪৫বছৰ বয়সৰ ভিতৰত মৃত্যুৰ হাৰ হৈছে ১৪.৪ শতাংশ। সেইদৰে ৪৫ৰ পৰা ৬০বছৰৰ ভিতৰৰ বয়সৰ ব্যক্তিৰ মৃত্যুৰ হাৰ হৈছে ৩৩.১ শতাংশ।
দেখা যায় যে ৬০ৰ পৰা ৭৫বছৰ বয়সৰ বাব তাতকৈ বেছি বয়সৰ লোকৰ কৰ’নাত অধিক মৃত্যু হৈছে।
আনহাতে, স্বাস্থ্য মন্ত্ৰ্যালয়ে কৰ’নাত মুঠ আক্ৰান্তৰ তুলনাত ভাৰতত মৃত্যু হোৱা লোকৰ হাৰ ৩.৩ শতাংশ বুলি দাঙি ধৰিছে। বিশ্বত সামগ্ৰিকভাৱে এই মৃত্যুৰ হাৰ ৫শতাংশ।
দেশখনৰ ৰাজ্যসমূহৰ মাজত এই মৃত্যুৰ হাৰৰ ক্ষেত্ৰত কেৰালাৰ অৱস্থা আটাইতকৈ উন্নত। ইয়াত মৃত্যুৰ হাৰ ০.৫শতাংশ। তদুপৰি, দেশত ১৩শতাংশ লোক সুস্থ হৈ উঠিছে।
স্বাস্থ্য মন্ত্ৰ্যালয়ৰ যুটীয়া সচিব লাব আগৰৱালে শনিবাৰে সংবাদমাধ্যমৰ দাঙি ধৰা তথ্য অনুসৰি ভাৰতত কৰ’নাত আক্ৰান্ত ষাঠিৰ উৰ্দ্ধৰ ব্যক্তিৰ মৃত্যুৰ হাৰ ৭৫.৩শতাংশ।তদুপৰি, ইয়াৰ ৮৩ শতাংশই কৰ’নাত আক্ৰান্ত হোৱাৰ পূৰ্বে আন বেমাৰত ভূগি আছিল।
স্বাস্থ্য মন্ত্ৰ্যালয়ৰ তথ্য অনুসৰি ভাৰতত শনিবাৰ পৰ্যন্ত মুঠ কৰ’না আক্ৰান্তৰ সংখ্যা ১৮,৭৯২জন। ইয়াৰ ভিতৰত ৪৮৮জন লোকৰ মৃত্যু হৈছে।
চৰকাৰী তথ্য অনুসৰি, দেশত বৰ্তমান চিকিৎসাধীন হৈ থকা কৰ’না আক্ৰান্ত লোকৰ সংখ্যা ১২,২৮৯জন। তদুপৰি, ২,০১৪জন লোক সুস্থ হৈ হাস্পাতলৰ পৰা উভতিছে। আক্ৰান্ত হোৱা লোকৰ ভিতৰত ৭৬জন বিদেশী নাগৰিকো আছে।
