দেশত কৰ’নাৰ সন্ত্ৰাস অব্যাহত আছে। চলিত মাহত প্ৰতিদিনেই আক্ৰান্তৰ সংখ্যা দ্ৰুত গতিত বৃদ্ধি পাই আহিছে।
সেইদৰে কোভিড যোদ্ধা স্বাস্থ্যকৰ্মীসকলৰ মাজতো সংক্ৰমণ বৃদ্ধি পাইছে। স্বাভাৱিকতে এই কথাই দেশৰ স্বাস্থ্যসেৱাত উদ্বেগ বৃদ্ধি কৰিছে।
কৰ’না মহামাৰী আৰম্ভ হোৱাৰে পৰা চিকিৎসক তথা স্বাস্থ্যকৰ্মীসকলে প্ৰথম শাৰীত থাকি কৰ’নাৰ বিৰুদ্ধে নিৰৱিচ্ছিন্ন সেৱা আগবঢ়াই আহিছে।
ইয়াৰ মাজতে এই কৰ’না যোদ্ধাসকলো কৰ’নাৰ সংক্ৰমণৰ গ্ৰাসত পৰিছে।
কেন্দ্ৰীয় স্বাস্থ্য মন্ত্ৰ্যালয়ৰ তথ্য অনুসৰি, দেশত যোৱা কেইমাহত ৮৭হাজাৰতকৈয়ো অধিক স্বাস্থ্যকৰ্মী কৰ’নাত আক্ৰান্ত হৈছে।
তথ্য অনুসৰি দেশত এতিয়ালৈকে কৰ’নাত আক্ৰান্ত হৈ ৫৭৩গৰাকী কোভিড যোদ্ধা স্বাস্থ্যকৰ্মীৰ মৃত্যু হৈছে।
আক্ৰান্তসকলৰ ভিতৰত সৰ্বাধিক প্ৰায় ৭৪শতাংশ স্বাস্থ্যকৰ্মী আক্ৰান্ত হৈছে মহাৰাষ্ট্ৰ, দিল্লী, কৰ্ণাটক, পশ্চিমবংগ, তামিলনাডু আৰু গুজৰাট এই ছয়খন ৰাজ্যত।
স্বাস্থ্যকৰ্মীৰ মৃত্যুৰ ক্ষেত্ৰতো এই ছয়খন ৰাজ্যত মুঠ মৃত্যুৰ ৮৬ শতাংশ।
আনহাতে, এইক্ষেত্ৰত তালিকাৰ শীৰ্ষত আছে মহাৰাষ্ট্ৰ। দেশৰ সৰ্বমুঠ আক্ৰান্ত স্বাস্থ্যকৰ্মীৰ ভিতৰত মহাৰাষ্ট্ৰত হৈছে ২৮ শতাংশ। সেইদৰে কৰ’নাৰ বিৰুদ্ধে যুঁজত মুঠ যিমান স্বাস্থ্যকৰ্মীয়ে প্ৰাণ হেৰুৱাইছে তাৰ ভিতৰত অকল মহাৰাষ্ট্ৰতে হৈছে ৫০শতাংশ।
মহাৰাষ্ট্ৰত মুঠ ২৯২গৰাকী স্বাস্থ্যকৰ্মীৰ মৃত্যু হৈছে। আনহাতে, কৰ্ণাটক আৰু তামিলনাডুত মৃত্যু হৈছে ক্ৰমে ৪৬ আৰু ৪৯গৰাকী স্বাস্থ্যকৰ্মীৰ।
