তেলংগানাৰ ৱালাঙ্গলত এটা গাঁতৰ পৰা ৯ টা মৃতদেহ উদ্ধাৰ কৰিছে স্থানীয় আৰক্ষীয়ে।
ঘটনাটোৱে ইতিমধ্যে তেলেংগানা সমগ্ৰ ৰাজ্যজুৰি চাঞ্চল্যৰ সৃষ্টি কৰিছে।
আৰক্ষীৰ সূত্ৰৰ মতে সোমবাৰে উক্ত মৃতদেহকেইটা উদ্ধাৰ কৰে আৰক্ষীয়ে।
ইতিমধ্যে ঘটনা সংক্ৰান্তত গোৰেকুন্তা গাঁৱৰ পৰা সঞ্জয় যাদৱ নামৰ এজন ২৪ বছৰীয়া যুৱকক গ্ৰেপ্তাৰ কৰি আৰক্ষীৰ ছটা গোটে পৃথকে পৃথকে মাৰাথন জেৰা চলাইছে।
অভিযুক্ত সঞ্জয় যাদৱ বিহাৰৰ আৰু তেওঁ যোৱা ছটা বছৰে তেলেংগানাৰ উক্ত গাঁওখনত বাস কৰিছিল।
ৱাৰাঙ্গলৰ আৰক্ষী অধীক্ষক ভি ৰবীন্দ্ৰই সংবাদ মাধ্যমক কয় যে, অভিযুক্তই পূৰ্বে পৰিয়ালটোৰ সম্পৰ্কীয় এগৰাকী মহিলাৰ হত্যাৰ বিষয়টোক গাপ দিবলৈ এই হত্যাকাণ্ডটো সংঘটিত কৰিছে।
‘এটা হত্যাকাণ্ডক গাপ দিবলৈ তেওঁ ৯ টা হত্যাকাণ্ড সংঘটিত কৰিলে।’ আৰক্ষী অধীক্ষকে কয়।
‘হত্যাকাৰীয়ে খাদ্যত শ্লিপিং পিল মিহলাই দিয়ে আৰু সংজ্ঞাহীন হোৱাৰ পিছত লোককেইজনক টানি নি এটা গাঁতত পেলাই দিয়ে।’ আৰক্ষীয়ে কয়।
মৃত মাছুদ নামৰ লোকজন পশ্চিমবংগৰ পৰা প্ৰব্ৰজন কৰি যোৱা ২০ বছৰে তেলেংগানাত বাস কৰিছিল। মাছুদৰ লগতে পৰিবাৰ, জী আৰু ৩ বছৰীয়া নাতিকো হত্যা কৰা হৈছে।
এদিনৰ পিছতে পুনৰ মাছুদৰ দুই পুত্ৰ আৰু তেওঁলোকৰ সৈতে একেলগে কৰ্মৰত এজন বন্ধু আৰু অন্য দুজন লোকৰ মৃতদেহটো উক্ত গাটৰ পৰা উদ্ধাৰ কৰা হয়।
মৃতদেহকেইটাত আৰক্ষীয়ে কোনো আঘাতৰ চিহ্ন দেখা নাছিল আৰু ফৰেনছিক বিশেষজ্ঞই এয়া আত্মহত্যা নহয় বুলিও নিশ্চিত কৰে।
তদন্ত আৰু চিচিটিভি ফুটেজ পৰীক্ষা কৰি আৰক্ষীয়ে যাদৱক গ্ৰেপ্তাৰ কৰাৰ পিছতে যাদৱে উক্ত ৯ জন লোকক হত্যা কৰাৰ কথা স্বীকাৰ কৰে।
মাছুদৰ পত্নীৰ সন্ধানহীন ভতিজীক ৬ বছৰ পূৰ্বে যাদৱে হত্যা কৰিছিল আৰু মাছুদৰ পত্নীয়ে সন্ধানহীন ভতিজীৰ কথা আৰক্ষীক অৱগত কৰিম বুলি কোৱাৰ বাবেই পৰিয়ালটোৰ সৈতে ৯ জন লোকক হত্যা কৰাৰ বুলি যাদৱে আৰক্ষীৰ আগত স্বীকাৰ কৰিছে বুলি আৰক্ষীয়ে জনায়।
আৰক্ষীৰ মতে হত্যাকাৰী যাদৱে ছবছৰ পূৰ্বে হত্যা কৰা মহিলাগৰাকীৰ তিনি সন্তানৰ সৈতে চাৰি বছৰ ধৰি একেলগে আছিল।
পিছত মহিলাগৰাকীৰ এগৰাকী কন্যাৰ লগত যাদৱে সম্পৰ্কলৈ আহে।
এই কথা গম পাই মহিলাগৰাকীয়ে কন্যাৰ বিয়াৰ কথা পাতিবলৈ পশ্চিমবংগলৈ ৰে’লেৰ যাত্ৰা কৰে। উক্ত যাত্ৰা পথতে যাদৱে গাখীৰত শ্লিপিং পিল মিহলাই মহিলাগৰাকীক খোৱাই আৰু সংজ্ঞাহীন হোৱাৰ পিছত গলা মুচুৰি ট্ৰেইনৰ পৰা মহিলাগৰাকীৰ মৃতদেহটো পেলাই দিয়ে।
পিছত যাদৱে উভতি গৈ মহিলাগৰাকীৰ সন্তানসকলক কয় যে পশ্চিমবংগৰ পৰিয়ালৰ লগতে তেওঁ থাকি আহিল।
নিহত মাছুদৰ পত্নীয়ে দীৰ্ঘদিন মহিলাগৰাকীৰ সন্ধান নোপোৱাত আৰক্ষী জনোৱাৰ কথা কৈ অহাত যাদৱে তেওঁলোকক খাদ্যত শ্লিপিং টেবলেট মিহলাই হত্যা কৰে।
