ছ’চিয়েল মিডিয়াত দুয়োৰে চিনাকি।ইজনে সিজনলৈ কৰা বাৰ্তাৰ পৰা বন্ধুত্ব লাহে লাহে বাঢ়িবলৈ ধৰিলে। সেই বন্ধুত্বৰ পৰা প্ৰেম। সম্পৰ্কত সোমাই পৰাৰ পাছত দম্পতীহালে লগ পোৱাৰ সুযোগ পায়। কিন্তু লগ পোৱাৰ পাছতে ঘটে অঘটন।শেহতীয়াকৈ প্ৰেয়সীগৰাকীয়ে প্ৰেমিকৰ বিৰুদ্ধে মাৰপিট কৰাৰ এজাহাৰ দাখিল কৰে। সোমবাৰে কানপুৰত সংঘটিত হয় এই ঘটনা। যুৱতীগৰাকীৰ অভিযোগৰ ভিত্তিত আৰক্ষীয়ে যুৱকজনক গ্ৰেপ্তাৰ কৰে। ২০ বছৰীয়া অভিযুক্তৰ নাম দিপেন্দ্ৰ সিং।
আৰক্ষীৰ সূত্ৰৰ পৰা জানিব পৰা মতে, বহুদিন পূৰ্বে ইনষ্টাগ্ৰামত এগৰাকী যুৱতীৰ সৈতে দীপেন্দ্ৰই কথা-বতৰা পাতিছিল। ছচিয়েল মিডিয়াৰ জৰিয়তে দুয়োৰে বন্ধুত্ব। বন্ধুত্বৰ পৰা প্ৰেমলৈ। কথা পাতি দিপেন্দ্ৰই সেই যুৱতীগৰাকীৰ লগত সম্পৰ্ক গঢ়ি তোলে। দুয়োজনে প্ৰথমবাৰৰ বাবে লগ পোৱাৰ সিদ্ধান্ত লয়। পৰিকল্পনা অনুসৰি লগ কৰে যদিও কিন্তু প্ৰেয়সীক দেখি দিপেন্দ্ৰ আচৰিত হৈ পৰে।যুৱকজনে দেখে যে ছ’চিয়েল মিডিয়াত দেখা যুৱতীগৰাকী আৰু সন্মুখত থিয় হৈ থকা যুৱতীগৰাকীৰ ছবিৰ মিল নাই।
জেৰাৰ সময়ত দিপেন্দ্ৰই আৰক্ষীক জনোৱা মতে, ছোৱালীজনীয়ে ছ’চিয়েল মিডিয়াত অন্য ছবি পোষ্ট কৰিছে। আচলতে তেওঁৰ বয়স ৪৫ বছৰ। ছোৱালীগৰাকীৰ প্ৰকৃত বয়স গম পোৱাৰ পিছত খঙত দীপেন্দ্ৰই ছোৱালীজনীক মাৰপিট কৰিবলৈ ধৰে।ইয়াৰ পাছত ছোৱালীজনীৰ মোবাইলটো লৈ দীপেন্দ্ৰ পলাই যায়। লগে লগে ছোৱালীজনীয়ে ওচৰৰ থানালৈ গৈ দিপেন্দ্ৰৰ বিৰুদ্ধে এজাহাৰ দাখিল কৰে। কিন্তু দীপেন্দ্ৰৰ সৈতে থকা সম্পৰ্কক লৈ তেওঁ আৰক্ষীক এৰাই চলিছিল। ছোৱালীজনীয়ে দীপেন্দ্ৰক অচিনাকি মানুহ বুলি চিনাকি কৰাই দিয়ে। সেই অভিযোগৰ ভিত্তিতেই আৰক্ষীয়ে সত্যটো জানিব পাৰে। তাৰ ভিত্তিতেই কানপুৰ আৰক্ষীয়ে গ্ৰেপ্তাৰ কৰে দিপেন্দ্ৰক।
