কৰুণ! পঢ়া-শুনা নকৰাৰ বাবে পিতৃয়ে ন বছৰীয়া পুত্ৰক বেৰত খুন্দিয়াই তাৰ পাছত ডিঙি চেপি হত্যা কৰে। পৰিয়ালটোৱে ল’ৰাটোৰ মৃতদেহটো খৰখেদাকৈ পুতি থোৱাৰ চেষ্টা চলাই বিষয়টো ঢাকিবলৈ চেষ্টা কৰে। কিন্তু তাৰ আগতেই আৰক্ষীয়ে সেই স্থানত উপস্থিত হৈ শিশুটিৰ মৃতদেহ উদ্ধাৰ কৰে। ইতিমধ্যে আৰক্ষীয়ে গ্ৰেপ্তাৰ কৰিছে তেওঁৰ পিতৃ, আইতা আৰু ককাকক।
মহাৰাষ্ট্ৰৰ পুনেৰ বাৰামাটি চহৰত সংঘটিত হৈছে এই ঘটনা। শিশুটিৰ নাম পীয়ুষ ভাণ্ডলকাৰ। মঙলবাৰে শিশুটিৰ মৃত্যু হয়। আৰক্ষীৰ সূত্ৰ অনুসৰি শিশুটিৰ মাতৃ তেওঁলোকৰ সৈতে নাছিল। শিশুটিৰ মাক মাতৃগৃহলৈ ওলাই গৈছিল। শিশুটি দেউতাকৰ লগত আছিল। মঙলবাৰে দেউতাক মৃতকৰ পঢ়া-শুনাক লৈ উত্তেজিত হৈ পৰে। অভিযোগ অনুসৰি পঢ়া-শুনাত গুৰুত্ব নিদিয়াৰ বাবে পিতৃয়ে শিশুটিক প্ৰহাৰ কৰে। খঙত মূৰটো বেৰত খুন্দিয়াই দিয়ে। তাৰ পাছত শিশুটিক ডিঙি চেপি হত্যা কৰে।
বাকী পৰিয়ালৰ লোকেও এই ঘটনা ঢাকিবলৈ চেষ্টা কৰিছিল। প্ৰথমে শিশুটিক স্থানীয় চিকিৎসালয়লৈ লৈ যোৱা হয়। তাতে চিকিৎসকে তেওঁক মৃত ঘোষণা কৰে। পৰিয়ালৰ লোকে জানিবলৈ দিয়া মতে শিশুটি হঠাতে চেতনা হেৰুৱাই পেলায়। তাৰ পিছত তেওঁৰ মৃত্যু হয়। পৰিয়ালৰ লোকে আৰক্ষীক অৱগত নকৰাকৈয়ে শিশুটিৰ মৃতদেহ সৎকাৰ কৰাৰ ব্যৱস্থা কৰে।
পৰিয়ালটোৰ এই আচৰণক লৈ চুবুৰীয়াই সন্দেহ প্ৰকাশ কৰিছিল।আৰু আৰক্ষীক খবৰ দিয়ে। নিশা প্ৰায় ৯ বজাত শ্মশান গৃহলৈ গৈ আৰক্ষীয়ে শিশুটিৰ মৃতদেহ উদ্ধাৰ কৰে। লগতে মৃতদেহটো মৰণোত্তৰ পৰীক্ষাৰ বাবে প্ৰেৰণ কৰে। তেওঁৰ প্ৰতিবেদনত প্ৰকাশ পাইছে যে শিশুটিক ডিঙি চেপি হত্যা কৰা হৈছে। এই ঘটনাৰ পাছতে তেওঁৰ পিতৃ বিজয় ভাণ্ডলকাৰ, আইতাক শালন ভাণ্ডলকাৰ আৰু ককাক সন্তোষ ভাণ্ডলকাৰক গ্ৰেপ্তাৰ কৰা হৈছে। তেওঁলোকক জেৰা অব্যাহত আছে। এই হত্যাকাণ্ড ক্ষোভৰ বাবে সংঘটিত হৈছে নে আগতীয়াকৈ পৰিকল্পনা কৰা হৈছিল সেই বিষয়ে আৰক্ষীয়ে তদন্ত অব্যাহত ৰাখিছে।
