পোহনীয়া কুকুৰৰ আক্ৰমণত মৃত্যু ৯০ বছৰীয়া বৃদ্ধাৰ! হত্যাকাৰী কুকুৰ ওভতাই বিচাৰিলে নাতিয়েকে

উত্তৰ প্ৰদেশৰ কানপুৰত পোহনীয়া জাৰ্মান শ্বেফাৰ্ড কুকুৰৰ আক্ৰমণত মৃত্যু হয় এগৰাকী ৯০ বছৰীয়া মহিলাৰ। ঘটনাৰ পাছত পৌৰসভাই কুকুৰটোক লৈ যায়। কিন্তু কিছুদিনৰ ভিতৰতে বৃদ্ধাগৰাকীৰ নাতিয়ে কুকুৰটো ঘূৰাই দিবলৈ আবেদন জনায়। তেওঁ দাবী কৰে যে কুকুৰটোৰ অবিহনে ঘৰত কোনেও খাব নোৱাৰে।

উল্লেখ্য যে, এই মৰ্মান্তিক ঘটনা কানপুৰৰ বিকাশ নগৰত ১৪ মাৰ্চ অৰ্থাৎ হোলীৰ দিনটোত সংঘটিত হয়। মৃত লোকজনৰ নাম মোহিনী ত্ৰিবেদী। তেওঁ নাতি ধীৰু প্ৰশান্ত ত্ৰিবেদী আৰু বোৱাৰী কিৰণৰ সৈতে বাস কৰিছিল। মোহিনীৰ পুত্ৰ সঞ্জীৱ ত্ৰিবেদী ভাৰতীয় সেনাবাহিনীৰ অৱসৰপ্ৰাপ্ত কৰ্ণেল। পোহনীয়া জাৰ্মান শ্বেফাৰ্ডটোৱে কিছুদিন ধৰি বৰ খং কৰিছিল। ইয়াৰ পূৰ্বেও ধীৰু আৰু কিৰণ দুয়োজনেই কুকুৰ চম্ভালি থকাৰ সময়ত একাধিকবাৰ আঘাতপ্ৰাপ্ত হৈছিল।

হোলীৰ সন্ধিয়া মোহিনী দেৱীয়ে কুকুৰটোক খুৱাই থকা অৱস্থাত হঠাতে আক্ৰমণ কৰে। কুকুৰটোৱে অত্যন্ত হিংস্ৰ হৈ বৃদ্ধাগৰাকীক হত্যা কৰে।যাৰ ফলত থিতাতে তেওঁৰ মৃত্যু হয়। এই খবৰ পোৱাৰ লগে লগে স্থানীয় বাসিন্দাসকলে পৌৰসভাক এই বিষয়ে অৱগত কৰে। সেই নিশা পৌৰসভাৰ কৰ্মী আহি কুকুৰটোক লৈ যায়।

এই ঘটনাৰ পাছত মৃতকৰ নাতি ধীৰু প্ৰশান্ত ত্ৰিবেদীয়ে কানপুৰ পৌৰসভাক কুকুৰটো ঘূৰাই দিবলৈ আহ্বান জনাইছে।

অৱশ্যে কুকুৰটো ঘূৰাই দিয়াৰ ক্ষেত্ৰত পৌৰসভাই এতিয়াও কোনো সিদ্ধান্ত লোৱা নাই। পৌৰসভাৰ পশু বিভাগৰ ভাৰপ্ৰাপ্ত বিষয়া ডাঃ আৰ কে নিৰঞ্জনে কয় যে কুকুৰটোৰ আক্ৰমণাত্মক আচৰণৰ অভিযোগ লাভ কৰি আটক কৰি ৰখা হৈছে। ধীৰু ত্ৰিবেদীয়ে কুকুৰটো ঘূৰাই দিবলৈ আবেদন জনাইছে যদিও এতিয়াও অনুমোদন পোৱা নাই।