শেহতীয়াকৈ মাৰ্কিন যুক্তৰাষ্ট্ৰৰ লগতে সমগ্ৰ বিশ্বতে কাল সংহাৰী ৰূপ ধাৰণ কৰা কৰ’নাক প্ৰতিহত কৰাৰ বাবে বিশ্ব স্বাস্থ্য সংস্থা চমুকৈ WHO য়ে অহৰহ চেষ্টা অৱ্যাহত ৰাখিছে।
কৰ’নাত আক্ৰান্ত ৰোগীক সুস্থ কৰি তোলাৰ ক্ষেত্ৰতো চিকিৎসকসকলেই গুৰুত্বপূৰ্ণ ভূমিকা পালন কৰি আহিছে।
চীনৰ পাছতে উন্নত দেশ বিশেষকৈ মাৰ্কিন যুক্তৰাষ্ট্ৰ, ইটালী, স্পেইন, ব্ৰিটেইনত এই ৰোগত আক্ৰান্ত হৈ মৃত্যুৰ কিৰিলী পৰা পৰিলক্ষিত হৈছে। চীন, ইটালী, স্পেইন আৰু আমেৰিকাৰ দৰে ৰাষ্ট্ৰৰ চিকিৎসা ব্যৱস্থা ভাৰতৰ তুলনাত যথেষ্ট উন্নত যদিও তাত দিনক দিনে এই মাৰাত্মক ভাইৰাছৰ কবলত পৰি হাজাৰ হাজাৰ লোকে মৃত্যুক আকোৱালি লৈছে।
চিকিৎসা ব্যৱস্থাৰ ক্ষেত্ৰত উন্নয়নশীল ৰাষ্ট্ৰ ভাৰতবৰ্ষ ১৪১ নম্বৰত আছে। ভাৰতত বৰ্তমানলৈকে সাত শতাধিক লোক এই মাৰাত্মক ভাইৰাচত আক্ৰান্ত হৈছে। বাতৰি লিখা সময়লৈকে ২০ জন লোকে ইতিমধ্যে মৃত্যুক সাবটি লৈছে।
এনে পৰিস্থিতিত অসমৰ জ্যেষ্ঠ অভিজ্ঞ চিকিৎসক সকলৰ সমান্তৰালকৈ অসমৰ সমূহ চিকিৎসা মহাবিদ্যালয়ত অধ্যয়নৰত চূড়ান্ত বৰ্ষৰ শিক্ষাৰ্থীয়ে কৰ’ণা আক্ৰান্ত ৰোগীক চিকিৎসা সেৱা প্ৰদান কৰিবৰ বাবে সাজু হৈ উঠিছে। নৰ্থ ইষ্ট নাওৰ সাংবাদিকৰ সৈতে হোৱা কথা-বতৰাত ডি এম ই ডাঃ অনুপ বৰ্মণে এই কথা জনায়।
‘আমি অনুভৱ কৰিছো যে অত্যাধিক হাৰত কৰ’নাত আক্ৰান্ত ৰোগী চিকিৎসালয়ত আহি যাব পাৰে। আমি নহাটো আশা কৰো। যদিও অসমত তেনেকুৱা ধৰণৰ পজিটিভ কেচ নাই বা জৰুৰীকালীন দেখা নাই তথাপি আমি চিকিৎসকসকলে নিজকে সাজু কৰি ৰাখিব লাগিব। ইটালীত যি হাৰত মৃত্যুৰ হাৰ বাঢ়িছে তাত তেওঁলোকে মেডিকেলত পঢ়ি থকাসকলক ডাক্তৰ বনাই চিকিৎসা সেৱা আৰম্ভ কৰি দিছে। গতিকে আমিও আণ্ডাৰ গ্ৰেজুৱেট শিক্ষাৰ্থীসকলক সষ্টম কৰি থৈছো,‘-বৰ্মণে আমাৰ সাংবাদিকৰ আগত এইদৰে কয়।
তেওঁ আৰু কয়, ‘আমি প্ৰথম অৱস্থাত তেওঁলোকক চিকিৎসা সেৱাৰ কামত ব্যৱহাৰ নকৰো। যদি প্ৰয়োজন হয় বা ডাক্তৰ নাইকিয়া হৈ যায় তেতিয়া তেওঁলোকক এই সেৱাৰ লগত নিয়োগ কৰিম। কিয়নো চিকিৎসক সকলৰ এটা নিয়ম আছে যে তেওঁলোকে পাঁচদিন চিকিৎসা সেৱা আগবঢ়ালে ১৪ দিনৰ বাবে কুৱাৰেইনটেন্টত যাব লাগে।‘
তাৎপৰ্য্যপূৰ্ণভাৱে ৰাজ্যৰ স্বাস্থ্য বিভাগৰ হাতত ‘অজস্ৰ চিকিৎসক নাই’ বুলি সদৰী কৰি বৰ্মণে লগতে কয়, ‘আমাৰ চিকিৎসকৰ সংখ্যা কমি গ’লে চূড়ান্ত বৰ্ষৰ মেডিকেলৰ শিক্ষাৰ্থীসকলক চিকিৎসা সেৱাত নিয়োগ কৰিম। কিয়নো চূড়ান্ত বৰ্ষৰ ছাত্ৰ-ছাত্ৰীসকলৰ এই ক্ষেত্ৰখনত বহুখিনি অভিজ্ঞতা হৈ যায়। গতিকে তেওঁলোকৰ বাবে বিশেষ অসুবিধা নহ’ব বুলি ভাবিয়েই চৰকাৰে এই সিদ্ধান্ত লৈছে।‘
‘এই ৰোগ অন্য ৰোগৰ দৰে নহয় তথা চিকিৎসকৰ সুৰক্ষাৰ দিশটোও চালি-জাৰি চাব লাগিব,‘-বৰ্মণে লগতে কয়।
অসমত মুঠ ৬ খন চিকিৎসা মহাবিদ্যালয়ত প্ৰায় ৭০০ গৰাকী চূড়ান্ত বৰ্ষৰ ছাত্ৰ-ছাত্ৰী থকা বুলি বৰ্মণে জানিবলৈ দিয়ে।
পৰ্যাপ্ত চিকিৎসক নথকা অসমত কৰ’নাই যাতে মহামাৰী ৰূপ ল’ব নোৱাৰে তাৰ বাবে ৰাজ্যখনৰ জনসাধাৰণে লকডাউনকে ধৰি চৰকাৰী নিয়ম-নিৰ্দেশনাসমূহ আন্তৰিকতাৰে পালন কৰা উচিত।
