যোৱা ২০ নৱেম্বৰত মিজোৰামত প্ৰৱেশ কৰা বাংলাদেশৰ কুকি-চিন সম্প্ৰদায়ৰ ২৭০ জনৰো অধিক সদস্যক ৰাজ্য চৰকাৰৰ নথিত “আনুষ্ঠানিকভাৱে স্থানচ্যুত ব্যক্তি” বুলি কোৱা হৈছে। কিয়নো শৰণাৰ্থীসকলৰ ক্ষেত্ৰত ভাৰতৰ কোনো আইন নাই। সাধাৰণতে বৈধ ভ্ৰমণ নথি অবিহনে দেশত প্ৰৱেশ কৰা বিদেশী নাগৰিকসকলক অবৈধ অনুপ্ৰৱেশকাৰী হিচাপে গণ্য কৰা হয়।
কেন্দ্ৰীয় গৃহ মন্ত্ৰালয়ৰ তথ্য মতে, ২৫ টি নৱজাতক আৰু ৬০ গৰাকী মহিলাকে ধৰি ২৭০ জনীয়া কুকি-চিন সম্প্ৰদায়ৰ দলটো যোৱা ২০ নৱেম্বৰৰ পুৱতি নিশা বাংলাদেশ-মিজোৰাম সীমান্তত থকা সীমান্ত সুৰক্ষা বাহিনীৰ (বিএছএফ) টহল চকীৰ কাষ চপাৰ পিছত তেওঁলোকক প্ৰৱেশৰ অনুমতি দিয়া হৈছিল।
তেওঁলোকৰ লগত কোনো টালি-টোপোলা নাছিল আৰু মানৱীয়তাৰ ভিত্তিত তেওঁলোকক ভাৰতত প্ৰৱেশ কৰিবলৈ অনুমতি দিয়া হৈছিল।
লগতে পঢ়ক: অসম-মেঘালয় সীমান্তৰ মুক্ৰৰ দুৰ্ভাগ্যজনক ঘটনাৰ উচিত অনুসন্ধানৰ দাবী অসম নাগৰিক সমাজৰ
দৰাচলতে, বাংলাদেশৰ চিটাগং পাহাৰীয়া অঞ্চলৰ খ্ৰীষ্টান সম্প্ৰদায়ে মিজোৰামৰ লোকসকলৰ সৈতে ঘনিষ্ঠ জনগোষ্ঠীগত সম্পৰ্কত বান্ধ খাই আছে। মিজোৰাম চৰকাৰে এই সম্প্ৰদায়টোৰ বাবে অস্থায়ী আশ্ৰয় শিৱিৰ আৰু অন্যান্য সুবিধা স্থাপনৰ বাবে অনুমোদন জনাইছে।
বাংলাদেশ ৰেপিড একচন বেটেলিয়নে ইয়াৰ কিছুমান বিদ্ৰোহীৰ বিৰুদ্ধে পদক্ষেপৰ গ্ৰহণৰ পিছত তেওঁলোকে ভাৰতত আশ্ৰয় বিচাৰে।
তেওঁলোকৰ কাকো বিতাড়িত বা ঘূৰাই নপঠোৱাৰ ৰাজ্য চৰকাৰৰ নিৰ্দেশ অনুসৰি চাৰিখন বিদ্যালয় শৰণাৰ্থীসকলৰ বাবে আশ্ৰয় শিৱিৰলৈ পৰিৱৰ্তন কৰা হৈছে।
২০২১ চনৰ ফেব্ৰুৱাৰীত চুবুৰীয়া দেশখনত সামৰিক অভ্যুত্থানৰ পিছত মিজোৰামত প্ৰৱেশ কৰা ম্যানমাৰৰ পৰা অহা ৪০ হাজাৰতকৈও অধিক শৰণাৰ্থীক দিয়া আশ্ৰয়ৰ দৰে এই শৰণাৰ্থীসকলকো একে ধৰণে ৰখা হ’ব।
উল্লেখ্য যে ২০২১ চনত, কেন্দ্ৰীয় গৃহ মন্ত্ৰালয়ে নাগালেণ্ড, মণিপুৰ, মিজোৰাম আৰু অৰুণাচল প্ৰদেশৰ মুখ্য সচিবসকলক “ম্যানমাৰৰ পৰা ভাৰতলৈ ঘটা অবৈধ অনুপ্ৰৱেশ নিয়ন্ত্ৰণ কৰিবলৈ আইন অনুসৰি উপযুক্ত ব্যৱস্থা ল’বলৈ” কৈছিল।
লগতে পঢ়ক:পাকিস্তানৰ নতুন সেনা প্ৰধান লেফটেনেন্ট জেনেৰেল চৈয়দ আসিম মুনীৰ
কেন্দ্ৰীয় গৃহ মন্ত্ৰালয়ে কৈছিল যে ৰাজ্য চৰকাৰৰ কোনো বিদেশীক “শৰণাৰ্থী’ৰ মৰ্যাদা দিয়াৰ কোনো ক্ষমতা নাই আৰু ভাৰত ১৯৫১ চনৰ ৰাষ্ট্ৰসংঘৰ শৰণাৰ্থী সন্মিলন আৰু ইয়াৰ ১৯৬৭ চনৰ প্ৰটোকলৰ স্বাক্ষৰকাৰী নহয়।
মিজোৰামত এইদৰে ঘটা শৰণাৰ্থীৰ অনুপ্ৰৱেশে সীমান্তত থকা অসমৰ বাবেও শংকাৰ সৃষ্টি কৰে। কিয়নো মিজোৰামৰ পৰা অসমলৈ প্ৰব্ৰজন ঘটাৰ যথেষ্ট সম্ভাৱনা আছে। অসমত কুকি সম্প্ৰদায়ৰ লোক দীৰ্ঘসময়ৰ পৰা অসমত বসবাস কৰি আছে। ৰাজ্যখনৰ কাৰ্বি আংলং আৰু ডিমা হাচাওত কুকি সম্প্ৰদায়ৰ লক্ষাধিক লোক সূদীৰ্ঘ কালৰে পৰা বসবাস কৰি আছে।
উল্লেখ্য যে কুকি-নগা সংঘাতৰ সময়ত বহু কুকি লোকে আশ্ৰয় বিচাৰি অসমত প্ৰৱেশ কৰিছিল। অৱশ্যে পিছত পৰিস্থিতি স্বাভাৱিক হোৱাত তেওঁলোকে নিজ স্থানলৈ প্ৰত্যাৱৰ্তন কৰিছিল। শেহতীয়াভাৱে হোৱা শৰণাৰ্থী অনুপ্ৰৱেশৰ ঘটনাৰ পিছত অসমত পুনৰ প্ৰব্ৰজনৰ সম্ভৱনা নুই কৰিব নোৱাৰি। যিহেতু এই শৰণাৰ্থীসকলৰ ক্ষেত্ৰত কেন্দ্ৰীয় চৰকাৰৰ কোনো স্পষ্ট নীতি নাই।
বাতৰি অনুসৰি, এই কুকি-চীন-বাংলাদেশী শৰণাৰ্থী বিষয়টোকলৈ কেন্দ্ৰীয় গৃহ মন্ত্ৰালয়ে কেন্দ্ৰীয় প্ৰতিৰক্ষা মন্ত্ৰালয়ৰ সৈতে কথা পাতিছে।
অসমত কুকি জনগোষ্ঠী ৰাজ্যখনৰ সামাজিক-ৰাজনৈতিক জীৱনৰ সৈতে মিলি গৈছে। অসমৰ কুকি জনগোষ্ঠীয়ে ব্ৰিটিছৰ সৈতে সংঘাতত লিপ্ত হোৱাৰ ইতিহাসো আছে। কুকি জনগোষ্ঠীৰ অন্তৰ্গত কেইবাটাও উপজাতি দীৰ্ঘদিনে অসমৰ সমাজ জীৱনৰ অবিচ্চেদ্য অংগ হিচাপে বসবাস কৰি আছে।
অতীজৰে পৰা অসমত থকা এই কুকি জনগোষ্ঠীৰ লোকসকলৰ সৈতে সম্পৰ্কৰ ৰেশ টানি অসমতো কুকি শৰণাৰ্থীৰ প্ৰৱেশ ঘটিব পাৰে নেকি?
এই সন্দৰ্ভত কুকি সম্প্ৰদায়ৰ নেতা হেচন ছিটলহোৱে কয় যে বাতৰিত আমি পাইছো যদিও অসমলৈ এতিয়াও অনুপ্ৰৱেশৰ কোনো ঘটনা ঘটা নাই। তেনে কিবা ঘটিলে আমি নিশ্চয় গম পাম। অসমত এতিয়া বসবাস কৰা কুকি লোকসকল সকলো ১৯৬৪ চনৰ পূৰ্বৰ। তাৰপিছত কোনো লোক অহা নাই। তেওঁ জানিবলৈ দিয়া মতে অসমৰ কাৰ্বি আংলং জিলাত প্ৰায় ৩০ হাজাৰ মান কুকি সম্প্ৰদায়ৰ লোক বাস কৰে। আনহাতে, ডিমা হাচাওত কুকি ভাষী সম্প্ৰদায়টোৰ প্ৰায় ৬০ হাজাৰ লোকৰ উপৰি কুকি জনগোষ্ঠীৰ উপজাতিৰ আন ৪০ হাজাৰ লোকেও বসবাস কৰি আছে।
