”দুদিন আগতে পশ্চিম কাৰ্বি আংলঙৰ অসম-মেঘালয় সীমান্তৰ মুক্ৰত হোৱা সীমা বিবাদত ছজন লোকৰ মৃত্যু হোৱা ঘটনাটো অতি দুৰ্ভাগ্যজনক আৰু নিন্দনীয়।এতিয়া তাক লৈ নানাধৰণৰ জল্পনা -কল্পনা আৰু পৰ্যালোচনা আৰম্ভ হৈছে।কিন্তু যি ছজন লোকৰ এই ঘটনাত প্ৰাণ গ’ল তেওঁলোক আৰু কেতিয়াও উভতি নাহে। তেওঁলোকৰ পৰিয়ালৰ বাবে এই ক্ষতি অপূৰণীয়।কোনো সান্ত্বনাই তেওঁলোকৰ অভাৱ পূৰণ কৰিব নোৱাৰে।”
অসম নাগৰিক সমাজৰ সভাপতি অজিত কুমাৰ ভূঞা আৰু সাধাৰণ সম্পাদক পৰেশ মালাকাৰে প্ৰেৰণ কৰা এক বিবৃতিত এইদৰে কয়।
বিবৃতিটোত কোৱা হৈছে, ‘’একেখন দেশৰ ভিতৰৰ মানুহ এনেকৈ সীমা বিবাদত মৰিবলগা হোৱাটো কেন্দ্ৰ চৰকাৰ আৰু ৰাজ্য চৰকাৰ দুখনৰ বাবে এক চৰম ব্যৰ্থতা।ইতিমধ্যে ঘটনাটোক কেন্দ্ৰ কৰি দুয়োখন ৰাজ্যৰ সীমামূৰীয়া ঠাইবোৰত পৰিস্থিতি উত্তেজনাপূৰ্ণ হৈ পৰিছে। তৃণমূল পৰ্যায়ত সীমা বিবাদে যদি এনে ৰক্তাক্ত ৰূপ লয়, তেন্তে চাৰিওফালে প্ৰচাৰ চলাই কেন্দ্ৰীয় গৃহ মন্ত্ৰীৰ লগত দুয়োখন ৰাজ্যৰ মুখ্যমন্ত্ৰীয়ে আলোচনাৰ যোগেদি সীমা বিবাদ নিষ্পত্তি কৰা হ’ল বুলি যে কেইদিনমান আগতে ঘোষণা কৰিছিল সেইটো কি আছিল? শীৰ্ষ নেতৃত্বৰ মাজত হোৱা আন্তঃৰাজ্যিক সীমা বিবাদৰ মীমাংসাই যদি বিবদমান অঞ্চলৰ সাধাৰণ ৰাইজক ঢুকি নাপায় তেনেহ’লে সেইটো কি ধৰণৰ মীমাংসা হ’ল? নে এইবোৰ কেৱল ৰাজনৈতিক স্বাৰ্থত কৰা প্ৰচাৰৰ কুচকাৱাজ ?’’
‘’আমি বিচাৰোঁ, এই সীমা সংঘৰ্ষত মৃত্যুবৰণ কৰা লোক সকলৰ নিকট আত্মীয় সকললৈ খৰতকীয়াকৈ উপযুক্ত আৰ্থিক সাহায্যৰ ব্যৱস্থা কৰা হওক আৰু পৰিস্থিতি নিয়ন্ত্ৰণ কৰিবলৈ দুয়োখন ৰাজ্যৰ প্ৰশাসনে তৎপৰতাৰে ব্যৱস্থা লওক। আমি বিশ্বাস কৰোঁ দুয়োখন ৰাজ্যৰ সাধাৰণ ৰাইজক আস্থাত নোলোৱাকৈ সীমা বিবাদৰ স্থায়ী সমাধান অসম্ভৱ। তাৰবাবে কেন্দ্ৰীয় চৰকাৰ আৰু দুয়োখন ৰাজ্য চৰকাৰ আগ্ৰহী হ’ব লাগিব,’’- বিবৃতিটোত নাগৰিক সমাজে কয়।
নাগৰিক সমাজে বিবৃতিটোত ঘটনাৰ প্ৰকৃত অনুসন্ধান দাবী কৰি কয়, ‘’এইটো সকলোৱে জনা কথা যে সকলো ঠাইৰে সীমান্ত অঞ্চল নানা ধৰণৰ দুষ্কাৰ্যৰ ঘাটি।সেয়ে চোৰাং কাঠৰ ব্যৱসায়ৰ কথাটো একো আচৰিত কথাও নহয়।কিন্তু এনে দুষ্কাৰ্যৰ লগত দুয়ো ফালৰ স্থানীয় প্ৰশাসন বা ৰাজনৈতিক দালালবোৰ যে জড়িত নহয় তাকো আমি ন দি ক’ব নোৱাৰোঁ। এতিয়া এজন মুখ্যমন্ত্ৰীয়ে কৈছে এইটো সীমা বিবাদ নহয়।আনজনে কৈছে হয়। আমি কাৰ কথা শুনিম, কাৰ কথা নুশুনিম? সেই বাবেই এনেবোৰ ঘটনা সম্পৰ্কে বাতৰি পৰিবেশন কৰোঁতে উগ্ৰ আবেগ বৰ্জন কৰা উচিত।কিন্তু, আমি বিচাৰোঁ কাৰ প্ৰৰোচনাত বা কাৰ ব্যৰ্থতাত এনে দুখজনক ঘটনা এটা ঘটিল তাৰ উচিত অনুসন্ধান হওক।দোষীয়ে শাস্তি পাওক।‘’
