শেহতীয়াকৈ ইজৰাইলৰ প্ৰধানমন্ত্ৰী বেঞ্জামিন নেতানিয়াহুৰ চৰকাৰৰ পদক্ষেপে ‘বৃহত্তৰ ইজৰাইল’ বিতৰ্কত নতুন মাত্ৰা লাভ কৰিছে। ৬ জানুৱাৰীত নেতানিয়াহুৰ বৈদেশিক মন্ত্ৰালয়ে আৰবী ভাষাত টুইট কৰি ইজৰাইলৰ নতুন মানচিত্ৰ প্ৰকাশ কৰিছিল। এই মানচিত্ৰত পেলেষ্টাইন, জৰ্ডান, লেবানন, ছিৰিয়া আৰু আন কিছুমান অঞ্চল ইজৰাইলৰ অংশ হিচাপে দেখুওৱা হৈছে।
এই নতুন মানচিত্ৰখন প্ৰকাশ পোৱাৰ পিছতে আৰব দেশসমূহৰ মাজত প্ৰতিবাদৰ জোৱাৰ উঠিছে। সংযুক্ত আৰব আমিৰশ্বাহী, কাটাৰ, চৌদি আৰব আদি দেশৰ শীৰ্ষ নেতৃত্বই এই মানচিত্ৰখনক তীব্ৰ গৰিহণা দিছে। তেওঁলোকৰ মতে, ইয়াৰ দ্বাৰা আন্তঃৰাষ্ট্ৰীয় আইন আৰু ইষ্ট বেংকত বসবাস কৰা পেলেষ্টাইনী জনসাধাৰণৰ অধিকাৰ খৰ্ব কৰা হৈছে। বিশেষকৈ পেলেষ্টাইন আৰু ইয়াৰ আশে-পাশে থকা দেশসমূহে এই মানচিত্ৰখনক তেওঁলোকৰ সাৰ্বভৌমত্বৰ ওপৰত আক্ৰমণ হিচাপে বিবেচনা কৰিছে।
ইয়াৰ উপৰিও আৰব বিশ্বৰ আটাইতকৈ গুৰুত্বপূৰ্ণ আন্তঃৰাষ্ট্ৰীয় সংস্থা আৰব লীগেও নেতানিয়াহুৰ এই পদক্ষেপক গৰিহণা দিছে। তেওঁলোকে ঘোষণা কৰে যে এনে কাৰ্য্যই আন্তঃৰাষ্ট্ৰীয় শান্তি প্ৰক্ৰিয়াত বাধাৰ সৃষ্টি কৰিব আৰু ইজৰাইল-পেলেষ্টাইন সংঘাতৰ সমাধান আৰু অধিক জটিল কৰি তুলিব। নেতানিয়াহু চৰকাৰৰ এনে একপক্ষীয় পদক্ষেপ কেৱল পেলেষ্টাইনী বা আৰব দেশৰ বাবেই নহয়, আন্তঃৰাষ্ট্ৰীয় সমাজৰ বাবেও গভীৰ চিন্তাৰ বিষয় হৈ পৰিছে।
ইজৰাইলৰ “বৃহত্তৰ ইজৰাইল” ধাৰণাটোৰ বিৰুদ্ধে আৰব বিশ্বত প্ৰতিবাদ নতুন নহয়। বিগত কেইটামান দশকত ইজৰাইল আৰু পেলেষ্টাইনৰ মাজত শান্তি স্থাপনৰ বাবে বিভিন্ন প্ৰচেষ্টা চলোৱা হৈছে যদিও এনে পদক্ষেপে পৰিস্থিতি আৰু অধিক উত্তপ্ত কৰাৰ আশংকা সৃষ্টি কৰিছে। বিশেষকৈ ইজৰাইলৰ চলি থকা সামৰিক অভিযান আৰু পেলেষ্টাইনত স্থায়ী বসতি নিৰ্মাণৰ ফলত আন্তঃৰাষ্ট্ৰীয় সমাজত দেশখনৰ বিৰুদ্ধে ক্ষোভ বৃদ্ধি পাইছে।
এই বিতৰ্ক গভীৰ আৰু জটিল হ’ব পাৰে, কিয়নো বহু আৰব দেশে যেনে সংযুক্ত আৰব আমিৰশ্বাহী আৰু বাহৰেইনে ইজৰাইলৰ সৈতে সম্পৰ্ক উন্নত কৰাৰ চেষ্টা কৰিছিল। কিন্তু নেতানিয়াহুৰ এই পদক্ষেপে সেই প্ৰচেষ্টাসমূহ বাধা দিব পাৰে আৰু আৰব দেশসমূহৰ মাজত ইজৰাইল বিৰোধী আৱেগক আৰু অধিক সুদৃঢ় কৰিব পাৰে।
