মাজ আকাশতে ভাঙি গ’ল ইলন মাস্কৰ সপোনৰ ষ্টাৰশ্বিপ। এই মহাকাশযানখন বৃহস্পতিবাৰে পৰীক্ষামূলকভাৱে উৎক্ষেপণ কৰা হয়। কিন্তু উৎক্ষেপণৰ মাত্ৰ আঠ মিনিটৰ পিছতে ষ্টাৰশ্বিপখন ভাঙি টুকুৰা হৈ পৰে। ইয়াৰ ফলত বৃহৎ অঞ্চলত বিমান সেৱাত ব্যহত হয়। কমেও ২০খন বিমানৰ পথ সলনি কৰিবলগীয়া হয়। অৱশ্যে আমেৰিকান কোটিপতিগৰাকীয়ে সমগ্ৰ বিফলতাক অতি ধেমেলীয়া ধৰণে লৈছে।
মাস্কৰ কোম্পানী স্পেচএক্সে চন্দ্ৰলৈ মানুহ প্ৰেৰণ কৰাৰ লক্ষ্যৰে ২০২৩ চনত আৰম্ভ কৰিছে ষ্টাৰশ্বিপ প্ৰকল্প। ইয়াৰ পূৰ্বে ৬ খন ষ্টাৰশ্বিপ নিৰ্মাণ কৰি উৎক্ষেপণ কৰা হৈছে। বৃহস্পতিবাৰে পৰীক্ষামূলকভাৱে উৰণ কৰা হয় সপ্তমখন ষ্টাৰশ্বিপ।
ষ্টাৰশ্বিপখন উৎক্ষেপণৰ এঘণ্টাৰ পিছত পুনৰ ভাৰত মহাসাগৰত অৱতৰণ কৰাৰ পৰিকল্পনা কৰা হৈছিল। কিন্তু বাস্তৱত ইয়াৰ বিপৰীত ঘটিল। মাস্কৰ সপোনৰ ষ্টাৰশ্বিপখন উৎক্ষেপণৰ কিছু সময়ৰ পিছতে টুকুৰা টুকুৰ হৈ পৰে। মেক্সিকো উপসাগৰৰ এক বিশাল অঞ্চলত ষ্টাৰশ্বিপৰ ধ্বংসাৱশেষ সিঁচৰতি হৈ পৰে।
ষ্টাৰশ্বিপখন ভাঙি যোৱাৰ মুহূৰ্তটো কেমেৰাত বন্দী কৰিছিল সংবাদ সংস্থা ৰয়টাৰে। তাত দেখা যায় যে সমগ্ৰ আকাশ ধোঁৱাই আৱৰি ধৰিছে। জ্বলি থকা ষ্টাৰশ্বিপখনৰ ভগ্নাংশ জুইৰ গোলকৰ দৰে মাটিৰ ফালে নামি আহিছে। ইয়াৰ বাবেই বিমান সেৱা ব্যাহত হৈ পৰে। খবৰ অনুসৰি মিয়ামি বিমানবন্দৰত কেইবাখনো বিমান বাতিল কৰা হৈছে। ২০খন বিমানে দিশ সলনি কৰিব লগা হৈছে। ষ্টাৰশ্বিপৰ ধ্বংসাৱশেষৰ ফলত বিমানৰ ক্ষতি নহ’বৰ বাবে এই সিদ্ধান্ত লোৱা হৈছিল।
ষ্টাৰশ্বিপখন কিয় এনেকৈ ভাঙি গ’ল? স্পেচএক্সে জনোৱা মতে, উৎক্ষেপণৰ পিছত ৰকেটৰ পৃষ্ঠত থকা যন্ত্ৰসমূহৰ মাজত সমন্বয় বিঘ্নিত হয়। সেইবাবেই ষ্টাৰশ্বিপখন ভাঙি পৰিল। অৱশ্যে মাস্কে ধেমেলীয়া ভাৱেৰে ষ্টাৰশ্বিপখন ভাঙি যোৱাৰ ভিডিঅ’ শ্বেয়াৰ কৰে। তেওঁৰ ভাষাত “সফলতা নিশ্চিত নহয়।” “কিন্তু মনোৰঞ্জনৰ অভাৱ নহ’ব।” অৱশ্যে এই বিফলতাৰ মাজতো স্পেচএক্সে ভৱিষ্যতে সফলতা লাভ কৰিব বুলি আশাবাদী।
