১৪ ফেব্ৰুৱাৰী আন্তঃৰাষ্ট্ৰীয় ভেলেণ্টাইন দিৱস—যিটো দিন বিশ্বৰ বহু লোকে উদযাপন কৰে। কিন্তু কিছুমান দেশত অশ্লীলতা আৰু অনৈতিক কাম-কাজকে ধৰি বিভিন্ন কাৰণত এই দিৱস পালনক বাধা আৰোপ কৰা হয়। কিন্তু আফগানিস্তানত এই দিৱস উদযাপন সম্পূৰ্ণ নিষিদ্ধ। ২০২৩ চনত দেশত ভেলেণ্টাইন ডে’ উদযাপনত নিষেধাজ্ঞা আৰোপ কৰা হৈছিল। আনকি তালিবান চৰকাৰে ভেলেণ্টাইন ডে’ৰ লগত জড়িত সামগ্ৰী বিক্ৰীতো নিষেধাজ্ঞা আৰোপ কৰিছিল।
আফগানিস্তানত নিৰাপত্তাৰ চিন্তা, ৰক্ষণশীল সমাজ, আৰু নিষেধাজ্ঞাৰ বাবে ভেলেণ্টাইন ডে’ উদযাপন কৰা নহয়।
আনহাতে ইৰাণত চৰকাৰে সাধাৰণ মানুহক এই দিৱস উদযাপন কৰিবলৈ নিৰুৎসাহিত কৰে। তেওঁলোকৰ মতে এয়া পাশ্চাত্য সংস্কৃতি। যাৰ ইৰাণৰ লগত কোনো সম্পৰ্ক নাই।
ইছলামিক শ্বৰীয়ত আইন মানি চলা মধ্যপ্ৰাচ্যৰ দেশ ব্ৰুনাইত ভেলেণ্টাইন ডে’ত কোনেও কোনো ৰাজহুৱা অনুষ্ঠান অনুষ্ঠিত কৰিব নোৱাৰে। কাৰণ ইয়াক দেশত ইছলাম বিৰোধী কাম হিচাপে গণ্য কৰা হয়।
ইয়াৰ উপৰিও ছৌদি আৰবে ধৰ্মীয় আৰু সাংস্কৃতিক কাৰণত ভেলেণ্টাইন ডে’ৰ ৰাজহুৱা উদযাপনতো নিষেধাজ্ঞা আৰোপ কৰিছে।
পাকিস্তানৰ একাংশ লোকে ভেলেণ্টাইন ডে’ উদযাপন কৰে। কিন্তু ইয়াৰ ধৰ্মীয় আৰু সাংস্কৃতিক সংবেদনশীলতাৰ বাবে বেছিভাগ মানুহেই ইয়াক পালন কৰাৰ পৰা বিৰত থাকে।
তদুপৰি ধৰ্মীয় আৰু সাংস্কৃতিক কাৰণত কাটাৰত এই দিৱস পালনত সাধাৰণ লোকে অংশগ্ৰহণ কৰা দেখা নাযায়।
যদিও মালয়েছিয়াত ভেলেণ্টাইন ডে’ উদযাপনৰ ক্ষেত্ৰত কোনো বাধা নাই, তথাপিও দেশখনৰ ইছলামিক কৰ্তৃপক্ষই ইয়াক নিৰুৎসাহিত কৰিছে। ইয়াৰ উপৰিও ছোমালিয়া আৰু মৰিটানিয়াত এই দিৱস অতি কমেইহে পালন কৰা হয়।
