বৃটিছৰ কবলৰ পৰা দেশক স্বাধীন কৰাৰ উদ্দেশ্যে স্বাধীনতা সংগ্ৰামত নামি পৰা বৰপেটা জিলাৰ পোৰাভৰালৰ এগৰাকী ১০৯ বছৰীয়া স্বাধীনতা সংগ্ৰামীৰ নাম অন্তৰ্ভুক্ত নহ’ল ৰাষ্টীয় নাগৰিক পঞ্জীৰ তালিকাত।
উল্লেখযোগ্য যে কালি অৰ্থাৎ ১৫ আগষ্টত বৰপেটা জিলাৰ ভৱানীপুৰৰ শুকমানাহৰ পল্লাৰপাৰ বিজ্ঞান একাডেমিত অনুষ্ঠিত নৱাগত আদৰণি সভাৰ মুকলি সভাত স্বাধীনতা দিৱস উপলক্ষে অঞ্চলটোৰ দুগৰাকী স্বাধীনতা সংগ্ৰামীক সম্বৰ্ধনা জনোৱা হৈছিল। তেওঁলোক হৈছে কালঝাৰৰ নৰেশ্বৰ বৈশ্য (৮০) আৰু পোৰাভৰালৰ আলহাজ দুদু মিঞা (১০৯)।
কিন্তু পৰিতাপৰ কথা যে ইয়াৰে ১০৯ বছৰীয়া আলহাজ দুদু মিঞা নামৰ স্বাধীনতা সংগ্ৰামী গৰাকীৰ নাম এন আৰ চিৰ চূড়ান্ত খচৰাত অন্তৰ্ভুক্ত নহ’ল। ফলত উক্ত সভাত উপস্থিত লোকসকলৰ লগতে অঞ্চলটোৰ ৰাইজে তীব্ৰ প্ৰতিক্ৰিয়া তথা আক্ষেপ প্ৰকাশ কৰিছে।
পল্লাৰপাৰ বিজ্ঞান একাডেমিৰ পৰিচালনা সমিতিৰ সভাপতি মতিউৰ ৰহমান খানে সভাপতিত্ব কৰা মুকলি সভাখনত স্বাধীনতা সংগ্ৰামী দুগৰাকীক একোটাকৈ ছাতি, কিতাপৰ টোপোলা আৰু মান পত্রৰে সম্বৰ্ধনা জনোৱা হয়।
ইয়াৰ উপৰি অনুষ্ঠানটোত বঙাইগাঁওৰ ৰেচম পৰিদৰ্শক দেৱান মোৱাজ্জেম হুছেইন, বাক্সা জিলাৰ আমছুৰ সভাপতি মিনহাজুল ইমৰান, ভৱানীপুৰ আঞ্চলিক ছাত্র সন্থাৰ সভাপতি অংকুৰ তালুকদাৰ, বিশিষ্ট সমাজ কৰ্মী আঞ্জুৱাৰা আহমেদকে ধৰি ভালে সংখ্যক গন্য মান্য ব্যক্তি উপস্থিত থাকে।
