বয়স বা সামাজিক মৰ্যাদা, প্ৰেমৰ বাটত একোৱেই বাধা দিব নোৱাৰে — সেয়া বাৰে বাৰে প্ৰমাণিত হৈছে। শেহতীয়াকৈ এগৰাকী ৫০ বছৰীয়া পাকিস্তানী বাছ চালক আৰু এগৰাকী ২৪ বছৰীয়া মহিলা যাত্ৰীৰ প্ৰেম কাহিনীৰ বিষয়ে বহুলভাবে চৰ্চিত হৈছে।
পাকিস্তানৰ পঞ্জাৱৰ চান্নুৰ পৰা লাহোৰলৈ কৰ্মক্ষেত্ৰলৈ এখন বাছত দৈনিক অহা যোৱা কৰিছিল শ্বেহজাদী নামৰ যুৱতীয়ে। সেই সূত্ৰেই চিনাকী হৈছিল ছাদিক নামৰ বাছ চালক জনৰ লগত। সেই মাধ্যমেৰেই বাছ চালক ছাদিক আৰু নিয়মীয়া যাত্ৰী শ্বেহজাদীৰ মাজত স্থাপন হৈছিল প্ৰেমৰ সম্পৰ্ক।
এটা সাক্ষাৎকাৰত শ্বেহজাদীয়ে কয় যে, “ছাদিকৰ কথা কোৱাৰ ধৰণ, বাছ চলোৱাৰ ধৰণ, তেওঁৰ আচৰণ সকলো মোৰ মনত আছিল।” চান্নুৰ পৰা লাহোৰলৈ যোৱা দীঘলীয়া যাত্ৰাত সাদিকে পুৰণি প্ৰেমৰ গীত গাইছিল। দীঘলীয়া খোজ, প্ৰেমৰ গীত আৰু ইজনে সিজনৰ লগত চকুৰ সম্পৰ্ক স্থাপনত আমাৰ প্ৰেম গুঞ্জৰিত হৈ উঠিছিল। অৱশ্যে আমাৰ বাবে আটাইতকৈ ডাঙৰ প্ৰত্যাহ্বান আছিল ইজনে সিজনৰ আগত আমাৰ প্ৰেম স্বীকাৰ কৰা। অৱশেষত ক’বলৈ সাহস গোটাই ল’লোঁ৷
ছাদিক প্ৰথমে দুয়োৰে বয়সক লৈ চিন্তিত আছিল যদিও শ্বেহজাদীয়ে তেওঁক পতিয়ন নিয়াইছিল যে প্ৰেমত বয়স বাধা হ’ব নোৱাৰে। দীৰ্ঘদিনীয়া প্ৰেমৰ সম্পৰ্কৰ অন্তত এতিয়া দুয়োৰে বিবাহ সম্পন্ন হৈছে ।
