লুকাই লুকাই কাৰ সৈতে কথা পাতে যুৱকে? জনাৰ পিছতেই থানা পালেগৈ চাৰিগৰাকী পত্নী

বিয়াৰ পিছতো যুৱকজনে পৰিয়ালক সময় নিদিয়ে। তাতেই বিৰক্ত, অস্থিৰ। ইফালে প্ৰায়ে দেখা যায় যুৱকজন নিজৰ ফোনত ব্যস্ত। ৰাতিপুৱা আৰু দুপৰীয়া লুকাই লুকাই কাৰোবাৰ লগত গোপনে কথাৰ মহলা মাৰে। বিষয়টো অনুসন্ধান কৰি গম পোৱা যায় যে যুৱকজনে পঞ্চমবাৰৰ বাবে বিয়া পাতিবলৈ চেষ্টা কৰি আছে।

সৰ্বভাৰতীয় সংবাদ মাধ্যমৰ সূত্ৰ অনুসৰি এই ঘটনা সংঘটিত হৈছে কেৰালাৰ ভাৰ্কলাত। যুৱকজনৰ নাম নীতিশ বাবু। ৩১ বছৰীয়া এই যুৱকৰ বিৰুদ্ধে বিবাহৰ নামত প্ৰতাৰণা কৰি গহনা আৰু নগদ ধন চুৰি কৰাৰ অভিযোগ জনাইছে চাৰিগৰাকী পত্নীয়ে। ইতিমধ্যে আৰক্ষীয়ে যুৱকজনক গ্ৰেপ্তাৰ কৰিছে।

আৰক্ষীৰ সূত্ৰৰ পৰা জানিব পৰা মতে, যুৱকজনে পূৰ্বেও চাৰিজন যুৱতীৰ সৈতে বিবাহপাশত আবদ্ধ হৈছিল। কিন্তু তেওঁ কেতিয়াও আইনগতভাৱে কাকো বিয়া কৰোৱা নাছিল। শেহতীয়াকৈ তেওঁ আন এগৰাকী প্ৰেমিকাৰ সৈতে পঞ্চমবাৰৰ বাবে বিয়া পাতিবলৈ চেষ্টা কৰিছিল। পঞ্চমবাৰৰ বাবে বিয়া কৰাৰৰ পিছতো যুৱকজনে ধন আৰু সোণৰ গহনা লৈ পলায়নৰ পৰিকল্পনা কৰা বুলি অভিযোগ কৰে পত্নীসকলে।

যুৱকজনৰ চাৰিগৰাকী পত্নীয়ে অভিযোগ কৰিছে যে তেওঁৰ চতুৰ্থ পত্নীয়েই প্ৰথমে নীতিশৰ পঞ্চম বিবাহৰ চেষ্টাৰ বিষয়ে জানিব পাৰিছিল। ইয়াৰ পিছতে আন তিনিগৰাকী পত্নীৰ বিষয়ে জানিব পাৰি তেওঁ আৰক্ষীৰ ওচৰত এজাহাৰ দাখিল কৰে। তেওঁৰ অভিযোগৰ ভিত্তিত আৰক্ষীয়ে যুৱকজনক গ্ৰেপ্তাৰ কৰি তদন্ত অব্যাহত ৰাখিছে।