ভাঙি পৰিল বহুমহলীয়া অট্টালিকা, ৰাজধানী দিল্লীত বিপৰ্যয়; বহু লোক আৱদ্ধ হৈ পৰাৰ আশংকা!
পুৱাই ৰাজধানী দিল্লীত ভাঙি পৰে এটা বহুমহলীয়া অট্টালিকা। চাৰি মহলীয়া অট্টালিকা এটা তাচপাতৰ ঘৰৰ দৰে ভাঙি পৰে। উত্তৰ দিল্লীৰ ৱেলকাম এলেকাৰ ছিলমপুৰৰ জনতা মজদুৰ কলনীত শনিবাৰে পুৱা প্ৰায় ৭ বজাত সংঘটিত হয় এই দুৰ্ঘটনা।
যদিও এতিয়ালৈকে কোনো লোক হতাহতিৰ খবৰ পোৱা নাই, কমেও ৪ জন লোক আহত হৈছে। এই প্ৰতিবেদন লিখাৰ সময়লৈকে ঘৰৰ ভিতৰৰ পৰা ১০ জন লোকক উদ্ধাৰ কৰা হৈছে।
অগ্নিনিৰ্বাপক বাহিনীৰ সূত্ৰৰ মতে, ধ্বংসাৱশেষৰ ভিতৰত আৰু বহু লোক আবদ্ধ হৈ পৰাৰ আশংকা আছে। দ্ৰুত গতিত চলি আছে উদ্ধাৰৰ কাম।
আৰক্ষীৰ সূত্ৰ অনুসৰি ছিলমপুৰৰ জনতা মাজদুৰ কলনীৰ এই চাৰিমহলীয়া অট্টালিকাটো শনিবাৰে পুৱা প্ৰায় ৭ বজাত হঠাৎ ভাঙি পৰে। ঘৰটোত আঠৰ পৰা দহজন বাসিন্দা বাস কৰিছিল। ইয়াৰ ভিতৰত আছে তিনিগৰাকী মহিলা আৰু তিনিটা শিশু। এতিয়াও ভাঙি পৰা ঘৰটোৰ ভিতৰত ৬ জন লোক আবদ্ধ হৈ থকাৰ আশংকা কৰা হৈছে।
আহতসকলক ততাতয়াকৈ উদ্ধাৰ কৰি চিকিৎসাৰ বাবে ওচৰৰ চিকিৎসালয়লৈ প্ৰেৰণ কৰা হয়। ঘটনাস্থলীত অগ্নিনিৰ্বাপক বাহিনী উপস্থিত হৈছে। যুদ্ধসদৃশ গতিৰে চলি আছে উদ্ধাৰৰ কাম। অৱশ্যে এই দুৰ্ঘটনাৰ কাৰণ এতিয়াও স্পষ্ট হোৱা নাই। স্থানীয় ৰাইজে আৱদ্ধ হৈ থকা লোকসকলক উদ্ধাৰ কৰিবলৈ ব্যস্ত হৈ পৰিছে।