কাজিৰঙাৰ অগৰাতলি বনাঞ্চলত ভালুকৰ আক্ৰমণত বনকৰ্মী আহত; গুৱাহাটীলৈ প্ৰেৰণ
কাজিৰঙা ৰাষ্ট্ৰীয় উদ্যানৰ অগৰাতলি বনাঞ্চলৰ তামুলীপথাৰ বন শিবিৰ এলেকাত আজি পুৱা ভালুকৰ আক্ৰমণত গুৰুতৰভাৱে আহত হয় এজন বনকৰ্মী। ভালুকৰ আক্ৰমণত আহত বনকৰ্মীজনক লীলাধৰ শৰ্মা বুলি চিনাক্ত কৰা হৈছে।
তামুলীপথাৰ বন শিবিৰৰ বনকৰ্মী লীলাধৰ শৰ্মাই দেৱেন কুটুম নামৰ বনকৰ্মীজনৰ সৈতে ভালুকমাৰি অঞ্চলত শ্ৰমিকৰ কাম পৰিদৰ্শন কৰিবলৈ যাওঁতে ভালুকে আক্ৰমণ কৰি গুৰুতৰভাৱে জখম কৰে।
ভালুকৰ অতৰ্কিত আক্ৰমণৰ সময়ত লগতে থকা বন্দুকৰ গুলী ফুটাবলৈও সময় নাপালে লীলাধৰে। ইফালে লীলাধৰ শৰ্মাৰ লগত থকা দেৱেন কুটুম নামৰ বনকৰ্মীজনে কোনোমতে পলায় সাৰে।
ভালুকৰ অতৰ্কিত আক্ৰমণত আহত হোৱা বনকৰ্মী লীলাধৰ শৰ্মাক ততাতৈয়াকৈ বোকাখাত অসামৰিক চিকিৎসালয়ত প্ৰাথমিক চিকিৎসা প্ৰদান কৰা হয়।
ইয়াৰ পিছতে লীলাধৰ শৰ্মাক কাজিৰঙা ৰাষ্ট্ৰীয় উদ্যান কৰ্তৃপক্ষৰ উদ্যোগতে গুৱাহাটীৰ এপ’ল চিকিৎসালয়লৈ প্ৰেৰণ কৰা হয় ৷