ঘৰৰ সন্মুখত খেলি আছিল এটি চাৰি বছৰীয়া শিশু। হঠাৎ এটা নাহৰফুটুকীৰ আবিৰ্ভাৱ হ’ল। তাৰ পাছত শিশুটোক বাঘটোৱে পোনে পোনে হাবিৰ ফালে টানি লৈ গ’ল। ঘটনাটো হোৱাৰ সময়ত পৰিয়ালটোৰ কোনেও এই কথা লক্ষ্য কৰা নাছিল। বুধবাৰে সন্ধিয়া সন্ধানহীন হৈছিল ৰশ্মি নামৰ শিশুটি। তালাচীৰ অন্তত শনিবাৰে জংঘলৰ গভীৰতাৰ পৰা উদ্ধাৰ কৰে তেওঁৰ অংগ বিচ্ছিন্ন মৃতদেহ। তামিলনাডুৰ কইম্বাটুৰত সংঘটিত হৈছে এই ঘটনা।
ভালপাৰাই পাহাৰৰ পাচামলাই এষ্টেটৰ সমীপৰ ঘৰৰ পিছফালৰ চোতালত দুপৰীয়া আনদিনাৰ দৰে খেলা-ধূলা কৰি আছিল শিশুটি। ঘৰৰ মানুহবোৰ ঘৰৰ ভিতৰতে আছিল। হঠাতে তেওঁক বিচাৰি নাপাই পৰিয়ালৰ লোকে আৰক্ষীক খবৰ দিয়ে। এই খবৰ পোৱাৰ লগে লগে বন বিভাগৰ বিষয়া আৰু আৰক্ষী বাহিনীয়ে সেই স্থানত উপস্থিত হয়। চাৰিওফালৰ ঘন অৰণ্যত অনুসন্ধান আৰম্ভ হ’ল। ড্ৰোন, হাতত ধৰা চাৰ্চ লাইট, আনকি স্নিফাৰ কুকুৰো ব্যৱহাৰ কৰা হয়।
তিনিদিনীয়া তালাচীৰ অন্তত শনিবাৰে পাঁচ কিলোমিটাৰ দূৰৈৰ পচামলাই এষ্টেটৰ জংঘলৰ পৰা উদ্ধাৰ কৰা হয় কণমানিটিৰ শৰীৰৰ অংগ। ঘটনা পোহৰলৈ অহাৰ পাছৰে পৰা অঞ্চলটোত তীব্ৰ আতংক বিয়পি পৰিছে।
প্ৰসংগক্ৰমে যোৱা কেইবছৰমানৰ পৰা তামিলনাডুৰ বিভিন্ন জিলাত বনাঞ্চলৰ কাষৰীয়া অঞ্চলত মানুহ-বন্যপ্ৰাণীৰ সংঘৰ্ষৰ ঘটনা যথেষ্ট বৃদ্ধি পাইছে। বন্যপ্ৰাণী বিশেষকৈ চিতা আৰু হাতীৰ গাঁৱত প্ৰৱেশৰ ঘটনা বাৰে বাৰে পোহৰলৈ আহিছে। এনে পৰিস্থিতিত ৰাজ্যৰ বন বিভাগে কেইবাটাও পদক্ষেপ গ্ৰহণ কৰিছে। কিছুমান স্পৰ্শকাতৰ অঞ্চলত এআই চালিত কেমেৰা স্থাপন কৰা হৈছে। যিয়ে বন্যপ্ৰাণীৰ গতিবিধি অনুভৱ কৰিব পাৰে আৰু লগে লগে স্থানীয় বাসিন্দাৰ ফোনলৈ সতৰ্কবাণী প্ৰেৰণ কৰিব পাৰে।
এই ঘটনাৰ পাছতে প্ৰশাসনে স্থানীয় ৰাইজক ৰাতি বাহিৰলৈ ওলাই নাযাবলৈ আৰু শিশুক অকলে এৰি নাযাবলৈ বাৰ্তা প্ৰেৰণ কৰিছে। একে সময়তে চিতা ধৰাৰ বাবে চোৰাংচোৱাগিৰি বৃদ্ধি কৰা হৈছে।
